No.982/2021-2022
Lunglei the 15th June 2021 - Vawiin khan Lunglei South bialtu MLA Dr.K.Pachhunga chuan a bial huam chhunga Lunglei town area veng paruk(6) VLTF hruaitute Lunglei District Truck Owners Association Office, Lunglawn ah inkawmhona hun a hmanpui. Covid-19 hrileng do kawnga hmalakna tlangpui leh mipui leh VLTF mamawhte sawiho a ni. He hunah hian Lunglei CMO Dr LC Liana leh party hruaitute an tel.
He hunah hian VLTF hruaituten an khawtlang dinhmun report an pek bakah an harsatna leh mamawh hrang hrangte an sawi a, chung an harsatna leh mamawhte chu theih ang anga phuhruk zel a tum thu Dr.K.Pachhunga chuan a sawi. MLA chuan Veng paruk (6) te hnenah hian Covid 19 do-na hmanrua chi hrang hrang - N95 mask box 6, Hand Sanitiser box 25, PPE set 15 theuh a hlan a. Hemi bakah hian Lunglei South huam chhunga Hrangchalkawn UHC tan Oxygen concentrator pakhat (1) leh Pulse Oximeter pakhat (1), leh Tawipui South PHC tan Oxygen Concentrator pakhat (1) leh PPE set 5 a hlan bawk a ni.
Dr K. Pachhunga chuan Covid-19 hrileng do kawnga thahnemngai taka a hmatawnga thawktu VLTF te chu chhuanawm a tih thu sawiin khawtlang himna tura hmalak pui zelah a sawm a. Hrileng vanga harsatna tawh karah midang harsa zawkte tana luangchhuak mi thahnem tak an awm zel chu ropui a tih thu sawiin mipuite tan sawrkarin theihtawp a chhuah chhunzawm zel dawn a ni, a ti a. Hrileng avang mi tam tak an mangan karah social media lama thudik tawklo thehdarh anlo awm thin chu pawi a tih thu a sawi bawk.
CMO Lunglei Dr.LC.Liana pawhin thu sawiin "tun dinhmunah Lunglei khawpui chhungah 4C hmun 5 ah siam a ni a, 3C hi hmun 5 ah siam a ni tawh bawk a, Sawrkar hian Lunglei hi min ngaihsak em em a,tlak chham leh harsatna kan neih ve deuh dawn pawhin rang takin min chinfel sak nghal thin hi a lawmawm em em a, khawtlangin CCCC in lo siam pawhin Department chuan a theih ang zelin kan monitor anga, theihtawp kan chhuah tlang zel dawn a ni. Department lam chu eng hunah pawh kan in peih reng a ni, tiin, kalkhawmte hnenah disinfectant hnathawh dan leh siam dan bakah thehthang dan te a hrilhfiah nghal a ni.
Attachment
- Loading attachment...
