No.983/2021-2022

Lawngtlai, Nikir thla ni 15, 2021: Kum tina Mizoram Journalists' Association (MJA), Lawngtlai District te'n an lo hman thin, Green MJA Day chu vawiin khan hman niin, Chawnhua Lawngtlai Bawrhsap chenna (bungalow) chhehvelah DC leh DIPRO hovin District MJA member-te'n thing tiak an phun.

Thing tiak phun hmaa inkhawm tawi buatsaihah Lawngtlai Bawrhsap Dr Andrew H. Vanlaldika, Lawngtlai District MJA-a Patron Member chuan MJA te'n thing phun uar tura mipui zirtirna te, enkawl zuinaah tan lak a ngaih thu te an chanchinbua ziah mai duh tawk lo va, a taka an thawk chhuak thin chu lawmawm a tih thu a sawi a. Thing phun leh enkawl zui chungchangah District mipuite'n hma an sawn nasa hle nia a hriat thu sawiin, he lama harh tharna awm chho mek chu chhawm nun zel a pawimawh a ni, a ti.

Lawngtlai District MJA President Pu Lalngheta Ralte chuan Green MJA Day chu tangkai taka an hman thin thu sawiin, mi dangte'n thing phun leh enkawl zui lama tan an lak theih nan anmahni ngei thawk chhuaka kawngpui kam leh sawrkar department hmuna thing tiak phun nan leh thing phun tawh sa enkawla thawm that nan te an lo hman thin thu a sawi.

Kumina Green MJA Day-a  Lawngtlai DC chenna chhehvela thing tiak an phunte hi DC lamin a enkawl zui hna an thawk dawn a. Thing tiak hi 20 chuang an phun a ni.

Attachment

  • Loading attachment...