No.984/2021-2022

Kolasib 15th June 2021: Vawiin khan YMA Day pualin Kolasib district hmun hrang hrangah Deputy Commissioner, Addl. DC, SDO(S) leh Sub Hqrs YMA, Kolasib district hruaitute chu ințhendarhin Kolasib district huam chhung a VC-te nen khaw hrang hrangah thingphunna hun an buatsaih a, thing țiak phun  turte hi DFO, Kolasib-in a pe a ni. VLTF-te nen hri leng dona kawngah harsatna an neihte leh a sutkian dan turte sawiho nghal a ni bawk.

Dr H.Lalthlangliana, Deputy Commissioner, Kolasib chuan Kolasib district chhunga ramri hrul a khua awm, Bairabi, Phaisen, Vairengte, Saihapui 'V' bakah Pangbalkawn, Meidum, Saihapui 'K', Buhchangphai leh Phainuam te tlawhin kawngpui tinuam lehzual turin kawngpui kamah thing phun uar turin VLTF leh khawtlang hruaitu kal khawmte a chah a. Pu C. Liankunga, Vice President, Sub Hqrs YMA Kolasib pawhin YMA day pual a ramngaw humhalh leh thing phun uar chungchang a thuchah sawina hun hmangin mizo tlawmngaihna chhawm nung zeltu ni turin khaw hrang hrang YMA member-te a chah bawk a ni.

Dr.H.Lalthlangliana chuan ramri hrula khaw awmte VLTF  leh khawtlang hruaitute a kawmnaah hian ramri humhimna kawnga hmalakna sawt zawk kalpui a nih theih nan hmalakna daih rei tur ngaituah a ngaih fo thu a sawi a. Ngaihtuah thui lo tak chunga hmalakna chuan buaina bak a chawh chhuah ngai loh thu sawiin ramri hnai a awm khua mipuite chu buaina pumpelh zawng a hma latu nih tum turin a chah bawk a ni.

Deputy Commissioner chuan Covid-19 hrileng dona kawng a sawrkar thuchhuah hrang hrang kenkawh kawng a khawtlang hruaitute hmalaknaah lawmthu sawiin Sawrkar inkaihhruainate chu mitin himna tur a duan a nih avangin ngai pawimawh chhunzawm zel turin leh hrileng kar a mi harsa leh thlabarte thlamuan a puitu ni zel turin a chah. CCC ah emaw Home Quarantine lai a boralte chungchang sawiin Dr.H.Lalthlangliana chuan Medical team ten uluk takin ruang an sawngbawl hnu chu a him tawk anga ngaih a nih thu a sawi a, chhiat tawk chhungkua te rilru hliâm zualtu ni lovin thlamuantu ni zel turin VLTF hruaitute a chah bawk a ni. Khaw țhenkhat a 4C emaw 3C din tur a VLTF ten DC hnen a an lo thlen chu ngun tak a sawiho niin a viltu tur thawktute bakah a enkawlna senso ruahman ngaite sawi niin tun dinhmun atan chuan CCC awmsa in a la dawl zo rih ah ngaiin siam belh rih loh mai ni se tih a ni a, hri kai thar awm belh dan a zirin a țul anga siam belh zawk ni se tih a tur a rel a ni. Covid-19 vaccine lak dan tur chungchangte, VLTF-te duty kalhmang te bakah nitin mamawh phur lirthei din bikna ruahman a nih dan te leh khaw chhung a din chu dan khap tlat a nih thu te sawi zau a ni bawk.

Dr.H.Lalthlangliana hi Pu David J Byhnadaolai, Addl. SP, Kolasib leh Pu Hmingthanzuala, DIPRO ten an tawiawm a, bialtu Zonal Executive Magistrate țheuh ten lo dawngsawngin ramri hnaih a Police duty-na hmun a tlawh nghal a, Bairabi Zophai, Phaisen, Saihapui 'V' leh Vairengte ramri bulah te thing phunna hun a hmang bawk a ni.