2574/2024-2025
2024 Khuangchawi thla ni 17: National highway kawngpui laih zauh hna thawhin a sut buai avanga February 2023 aṭanga tihtawp tak, Hrangchalkawn Police Out Post bul ṭan ṭhat leh tur chu vawiin khan Lunglei South bialtu MLA Pu Lalramliana Papuia'n a hawng.
Pu Lalramliana Papuia chuan Hrangchalkawn Police Out Post bul ṭan ṭhat a ni leh tur chu lawmawm a tih thu sawiin, hma latu leh tha thawhtu zawng zawng chungah lawm thu a sawi a. Mipui himna leh ralmuanna chu ram tana thil pawimawh ber pakhat leh Mizoram sawrkar pawhin a ngaih pawimawh em em a ni tih sawiin, chumi atana thawktu ṭangkai ber pakhat chu police-te an nih angin Hrangchalkawna police inbun thar leh tur chu khawtlang leh bial chhung tan a hluin a thlamuanthlak hle a ni, a ti a. Mizoram sawrkarin ram mipui himna leh ralmuanna atan police 300 dawn la thar turin ruahmanna a siam mek tih tar langin, police hna chu hna zahawm a nih laiin a thawktute'n tihzahawm loh theih a ni a, chu vangin thawktute pawh fimkhur leh infuih thar reng a pawimawh, a ti a. Hawihhawmna, rinawmna, huaisenna, taimakna leh thu awihna nena khawtlang leh ram tana theih tawp chhuaha thawk zel turin police te chu a chah a. Khawtlang hruaitu, tlawmngai pawl leh mipuite pawh out post chhiat ṭhatah mawh la a, khawtlang leh ram siam ṭhatna hmanraw ṭangkai tak a nih theih nan ṭha taka thlawp leh thawhpui turin a chah bawk a. Mi sual che tla vilna atana Out Post mamawh tur cctv leh inverter chu MLA Fund remchang hmasa ber aṭangin a ngaihtuahsak tur thu a tar lang bawk.
Deputy Inspector General of Police (Southern Range) Pu C. Lalthanmawia pawhin thu sawiin, police chu remna leh muanna vawng himtu tur an ni tih a thawktute leh mipuite pawhin hriat chian a ṭul, a ti a. Mipui rorelna hnuaiah mipui kan zalen a, mahse, zalenna hi hman sual theih a ni tiin, kan ai awha kan thlan dan siamtute'n invawnna dan an siam chu mipuiin thu awih taka zawm a ngai, a ti a. Chen hona khawtlang leh ram nuam siam chu mipui kuta innghat a nih thu sawiin, sualna hrang hrang leh dan bawhchhiatna tirem turin police-te chuan khawtlang hruaitu, tlawmngai pawl leh mipuite thawhpuina bakah, kohhrante ṭawngṭaipuina te an mamawh tih a sawi.
Hrangchalkawn Police Out Post bul ṭan ṭhat tur hawnna hi Lunglei District Superintendent of Police Pu J. Lalmuankima'n kaihruaiin, Hrangchalkawn Police Out Post awmna chu kawng peng ṭhuam pawimawh lai tak, chhim lam kawt chhuaha hmanga ram dang nena insum dawn tawnna kalpui hun pawha hmun pawimawh tak tur a nih avangin out post awmna atana hmun remchang leh pawimawh tak a nih thu a sawi a. Baptist Church of Mizoram (BCM) Hrangchalkawn bialtu pastor Rev. C. Vanlalhruaia'n hunserh hmangin, Additional Superintendent of Police Pu K. Beihmotaosa chuan Hrangchalkawn Police Out Post tihtawp a nih tak dan leh bul ṭan ṭha leh tura hma lakna te a tar lang a. Hrangchalkawn Local Council Chairman Pu K. Lalmuanpuia'n khawtlang ai awhin thu a sawi bawk a. Lunglei Sub-Divisional Police Officer Pu Zarzokima'n lawm thu sawiin hun a khar a ni.
He hunah hian Lunglei Municipal Council (LMC)-a Executive Councillor Pu Zorinsanga Hnamte leh Ward X bialtu Councillor Pi Judy Lalhriatpuii te bakah, Lunglei District Executive Force hnuaia thawktute, Lunglei DIPRO, Hrangchalkawn Local Council member-te leh tlawmngai pawl hrang hrang hruaitute, Village Defence Party (VDP) leh political party hruaitute leh Hrangchalkawn khawtlang mipuite an tel a ni.
Lunglei District-a police out post awm chhun Hrangchalkawn Police Out Post hi hun eng emaw chen kalpui a nih hnuah a hmunhma hmasa chu national highway kawngpui zauh tur nen a insut buai avangin ṭhiah ngai dinhmunah a ding a. In dang luah tur a awm mai si loh avangin Police Headquarters (PHQ) pawmpuinain February 2023 aṭang khan Hrangchalkawn Police Out Post chu tihtawp a ni ta a. Bialtu MLA leh Councillor te hma lakpuinain District Police hotute'n bul ṭan ṭhat a nih leh theih nan hma lain, theih tawp chhuaha bawhzui a nih hnuah bul ṭan ṭha leh thei turin sawrkar phalna hmuh a ni a. Lunglei, Lawngtlai leh Hnahthial kawng peng ṭhuam laiah mimal in luah hawhin Hrangchalkawn Police Out Post hi bul ṭan ṭha leh tura ruahman a ni ta a ni.
Hrangchalkawn Police Out Post-ah hian In-charge (I/C) Inspector John Malsawmtluanga hovin thawktu - head constable pathum, constable pathum (hmeichhe pakhat telin) leh driver pakhat an awm dawn a. Office bungraw mamawh hrang hrang chhawp a nih bakah, lirthei bolero pakhat an kawl dawn a. Lunglei Police Station hnuaia khaw 63 awm ṭhin aṭanga khaw 20 chu Hrangchalkawn OP hnuaiah hian a awm tawh dawn a ni.
Attachment
- Loading attachment...
