2575/2024-2025

17th October, 2024 : Vawiin (Ni 17.10.2024) khan Hnam ziarang hmanga intihsiakna State Level Kala Utsav 2024 chu Chanmari YMA Hall, Aizawl-ah neih a ni a, State Project Director Pu Lalsangliana hovin Kala Utsav hi hman a ni.  State Level Kala Utsav-ah hian category 6-ah zirlaite an intihsiak a, category tina pakhatna theuhte chu Mizoram aiawha  National Level-a chhuak turte an ni.

SPD Pu Lalsangliana chuan he hunah hian thusawiin Kala Utsav chu hnam ziarang pholanna a nih piah lamah hnam hrang hrangte inpumkhatna atan te, zirlaite inchherhriamna atan te a tangkai thu a sawi a, kum danga National Level neihah Mizoramin lawmman kan lo lak nual tawh avangin kuminah pawh lawmman la thei ngei tura inbuatsaih turin zirlaite a chah a. Kala Utsav hlawhtling taka neih a nih theih nan Art & Culture Department leh Samagra Shiksha te an thawk dun thin chu lawmawm a tih thu a sawi bawk.

State Level Kala Utsav-ah hian National Level Kala Utsav-a tel tur thlan an ni a, Vocal music-ah Govt. Mizo Higher Secondary School, Aizawl; Instrumental Music-ah Govt. High School, New Siaha; Dance-ah Govt. Mizo Higher Secondary School;  Theatre-ah Academy of Arts and Sciences, Champhai; Visual Arts-ah Khawzawl Higher Secondary School Khawzawl; Traditional Story telling-ah Govt Mizo Higher Secondary School te thlan an ni.

Kala Utsav hi Ministry of Education-in India rama hnam zia rang chi hrang hrang tun hma atanga tun thlenga la chin chhoh zel zirlai talent nei tha tak tak ten an pholanna leh intihsiakna atana a buatsaih a ni a.  India ram state hrang hranga Secondary School leh Higher Secondary School zirlaite chu he Kala Utsav-ah hian an intihsiak thin a. National level-ah NCERT-in he Kala Utsav hi an buapui a,  Samagra Shiksha chuan state tinah he intihsiak hi an buatsaih thung a ni. State hrang hrangten mahni state chhungah theuh Kala Utsav hi an buatsaih a. State Level Kala Utsav-a State tina a ti tha te chu National Level Kala Utsav-ah an intihsiak leh ta thin a ni.