3043/2024-2025

2024 Sahmulphah thla ni 15: Vawiin khan Leitlangpui Music Festival 2024 chu a ni hnih nan Kawmzawl, Lungleiah hman chhunzawm niin, he hun hi Lunglei South bialtu MLA Pu Lalramliana Papuia chuan a hmanpui.

Pu Lalramliana Papuia chuan Leitlangpui Music Festival hman a nih theih nana sawrkar hotute duhsakna leh Minister hova Tourism Department hotute ṭhahnem ngaihna lawmawm a tih thu sawiin, Mizote'n pi pute aṭanga kut langsar tak tak kan neih piah lamah, kan tun hun milin sawrkarin kut ngaihhlutawm tak tak a huaihawt ṭhin, a ti a. Serkawn Concert 1932 aṭanga neih ṭhin kha chhim mipuiin an hlut em em ṭhin a, hla thar tam tak a pian phah a, zaipawl te a chawi nung bawk tiin, Serkawn Concert dungthulin Leitlangpui Music Festival chu Zoram deng chhuak hla thar leh mi thar hring chhuaktu ni zel thei se a duh thu a sawi.

Pu Lalramliana Papuia chuan Leitlangpui Music Festival chu a hlawhtlingin, mipui pawhin an hlut nia a hriat thu sawiin, festival-a sum sen ai hian kawng siam se, lei dawh se, ba rul se, phullem phah nan hmang se, tia duhthu lo sam an awm maithei a; mahse, lung rem, in sak leh kawng siam ringawt hi mipui mamawh awm chhun a ni bik lo va, chu'ng chu kan sum senna tur awm chhun pawh a ni bik lo, a ti a. Kum tluanin buai leh hah takin hna kan thawk a, sum tam tak seng pawhin ni hnih khat chu ṭhalai leh mipui mimirin thianghlim leh hlimawm taka kan talent pho chhuak a, kan intihhlimna hun kan siam ve a sual dawn em ni tiin, heti ang hun hi mihring nunin a mamawh berte zinga mi tho a nih avangin inthlahrung lo va, thianghlim leh am taka hun hmang turin mipuite a sawm a ni.

Vawiin Leitlangpui Music Festival ni hnihnaah hian chhunlaiah hun hman ṭan niin, rimawi chi kim nena inzaisiak (band contest) buatsaih a ni a. Band contest-ah hian band pariat (8) - Abstract Analogy, Fredys, Hill Side, Mezzo Ford, Phawthira Leh A Ṭhiante, QR Code, Sword Tune leh Trigger 02 te finalist niin an intihsiak a. Tlai dar 3 aṭanga zan lam thlengin concert-in chhunzawm a ni bawk.