3042/2024-2025

2024 Sahmulphah thla ni 15: Vawiin chawhnu khan Lunglei South bialtu MLA Pu Lalramliana Papuia chuan a chenna in, Salem Veng, Lungleiah a bial chhung thingtlang khuaa sawrkar school pali te hnenah an mamawh computer set leh printer a hlan.

Pu Lalramliana Papuia chuan MLA-a thlan tlin a niha a rilrua awm chu a bial chhung thingtlang khuate'n zirna leh hriselna lama an mamawh zir chian a, an harsatna tawh leh tlakbalna te a theih anga thawmsak a, hma lakpui a nih thu a sawi a. A thawh khat nan hriselna lama a bial chhung thingtlang khuaa khawtlang mipuite mamawh ṭhenkhat BP endikna, zunthlum endikna khawl leh hmanrua (test kit) te health sub-centre-ah pek chhuah a lo nih tawh thu sawiin, tun ṭumah zirtirtute'n sikul mamawh a hnena an thlen computer set pe chhuak leh theia a awm chu lawmawm a tih thu a sawi a. Hemi atan hian MLA Fund eng emaw zat sen ral a ni tih hria a, he'ng hmanruate hi zirna kawnga hma sawnpui ngei tur leh ṭan lak zualna atana hmang turin zirtirtute chu a chah a. A bial chhung, a bik takin thingtlang khuaa zirna leh hriselna lama thawktute chu mipui tana theih tawp chhuah zel tura ngenin, harsatna an tawhah leh mamawh an neihah a theih anga hma a lakpui zel theih nan a hnena thlen hreh lo turin a chah a ni.

Vawiina Lunglei South bialtu MLA Pu Lalramliana Papuia'n computer set leh printer a pekte hi - Ṭhaizawl Govt Primary School, Bualte Govt Middle School, Ṭawipui South HSS leh Mualṭhuam 'S' Primary School te an ni a. Zirtirtute'n sikul ai awhin he'ng khawlte hi dawngin, bialtu MLA chungah hian lawm thu an sawi a ni.