3041/2024-2025

Dated Hnahthial, the 15th November, 2024: Vawiin tlai dar 3 khan Hnahthial Bazar kawnah Ruihhlo do beihpui thlakna - Nasha Mukt Bharat Abhiyaan leh Voter-te tihtur chanvo inhrilhhriatna - Systematic Voters’ Education and Electoral Participation (SVEEP) pualin free concert neih a ni a. He hunah hian Hnahthial Bawrhsap leh District Election Officer ni bawk, Pi Rita Lalnunmawii Pachuau bakah Addl DC, Pu Zothanmawia Khiangte leh SDO(Sadar) Pi Esther Leihang ten thusawina hun an hmang a ni.

Bawrhsap chuan kalkhawmte hnenah thuchah sawiin ruihhlo hi tihchhin a pawi thu leh tihchhin loh law law a that ber thu a sawi a. He concert na a zai tura Icon sawm te chu tun dinhmun an thlen chhan chu an nun an vawn vang anih thu sawiin chutiang bawkin Hnahthial mipui, a bikin thalaite chu an nun uluk tura a duh thu a sawi a ni.

Bawrhsap chuan concert chhimtu kum tling tawh phawt chu Electoral roll-ah an chuan a pawimawh thu sawiin khua leh tui dik tak nih chuan kum tling, vote nei thei chin nih tawh phawt chuan Electoral roll-ah an hming chuantir ngei tura a duh thu a sawi a. Vote hi kan dikna chanvo anih avang leh mipui (citizen) kan nih anga kan hruaitu turte kan thlan theihna hmanrua pawimawh tak kan neih anih avangin chu dikna chu hmang tangkai tura a duh thu a sawi a ni.

Addl DC chuan he hunah thu sawiin ruihhlo chu kan ram kan hnam eichhe nasa bertu te zing ami anih avangin ka ngaihmawh a tul thu a sawi a. Electoral roll tin deuh thaw a mipa aia hmeichhia an tam zel chu thil ngaihmawhawm tak anih thu sawiin hei hi a chhan bulpui ber pakhat chu mipa ruihtheihthil leh ruihhlo vanga boral an tam vang anih thu a sawi a. Ruihhlo hi rukru a min siamtu, kan hma hun zawng zawng min rukbo saktu leh kan nih tur ang min nih tir theilotu anih thu sawiin hemi do let tur hian tan kan lak tlan a ngai a ni a ti a. Mipa ten ruihhlo an tih thin chhan ber pakhat te zing ami chu hmeichhiate an nih thu sawiin chumi anih avang tak chuan hmeichhiate pawn an mipa ngaihsan zawng thlang uluk tura a duh thu sawiin mipa ruihhlo ti thin te ngaihnepah neih a tul thu a sawi a. La ti chhin lo te chu ti chhin miah lo tura sawmin ti chhin tawh te pawh sim turin a chah nghal bawk a ni.

SDO Sadar chuan kalkhawmte hnenah thu sawiin kum 18 tling tawh chinte chu electoral roll a inthun ngei tura a duh thu a sawi a. Nakum lawka Village Council inthlanna awm turah vote thei chin zawng zawng ten vote an neih ngei theih nan an Booth Level Officer (BLO) theuh te chu e-roll a an awm leh awm loh zawt fiah turin leh an awm loh chuan in thuntir ngei tura a duh thu a sawi a ni.

He Nasha Mukt Bharat Abhiyaan cum SVEEP campaign puala Free Concert neihah hian Youth Icon, 2024 - Lalsangliana; Youth Icon, 2024 Top 4 - Ramengmawia leh Youth Icon, 2024 Top 7 - Zothankima te chuan zain mipui an awi a ni.