3040/2024-2025
2024 Sahmulphah thla ni 15: Vawiin khan Mizo Hmeichhe Insuihkhawm Pawl (MHIP) Venghlun Branch, Lunglei chuan Venghlun Indoor Stadium-ah an din champha phak vawi 50-na (Golden Jubilee) lawmna hun an hmang a. Lunglei West bialtu MLA Pu T. Lalhlimpuia chuan Khuallian niin a hmanpui.
Khuallian Pu T. Lalhlimpuia chuan MHIP Venghlun Branch-in kum 50 hmel a hmu thei chu lawmawm a tih thu sawiin, hruaitu hmasate leh tuna hruaitu ni mekte thawh rimna avanga he hun hi thleng thei an nih thu a sawi a. Chhungkuaah nute an pawimawh em em tih sawiin, nuin in chhungkhur a enkawl danin fate dinhmun thlengin a hril a ni tih hre thar leh turin MHIP member-te chu a chah a. Khawtlang siam ṭhatna kawnga hmeichhiate tha thawh chu a ropuiin a sawt em em tih sawiin, nasa zawkin chhungkaw kal tlang leh hmanraw dang hmanga ram leh khawtlang tana thawk zel turin a chah a ni.
Venghlun Branch MHIP Golden Jubilee lawmna inkhawm hi President Pi Zodinmawii chuan a kaihruai a. Lunglei Municipal Council (LMC)-a Ward No. IV Councillor Pu R. Lalramzauva pawhin Branch MHIP golden jubilee lawmpuina thu sawiin, nute pawimawhna chu kawng tinrengah hmuh theihin a lang tih a sawi a. Tun laiah hmeichhia ruihhlo bawiha tang eng emaw zat an awm a, hei hi nute'n in chhungkhur an enkawl thiam tawk loh rah a ni fo tiin, nute chuan in chhungkhur aṭanga siam ṭhat rawngbawl hna an thawh a pawimawh tak zet a ni, a ti.
MHIP Venghlun Branch kum 50 tlin lawmnaah hian zai leh lam leh intihhlimna chi hrang hrang nena hun hman niin, Lunglei Sub-Headquarters MHIP, Local Council Venghlun, MUP Venghlun leh Branch YMA Venghlun ai awh te aṭangin thu sawi ngaihthlak a ni bawk a. Tlai lamah jubilee lawmna ruai kil ho nghal a ni bawk.
MHIP Venghlun Branch hi kum 1968-ah "Nu Sikul" tia din niin, puan ṭhui khawl te dawngin, puan ṭhui zirna te siam ṭhin a ni a. Chumi hnuah "Nun Thar Pawl" tia hming thlak leh niin, kum 1964-ah MHIP tiin a hming thlak leh a ni a. Tun dinhmunah Branch member 822 an awm mek a ni.
