3039/2024-2025

2024 Sahmulphah thla ni 15: Vawiin khan Lunglei High Powered Committee (HPC) Vice Chairman Pu V. Malsawmtluanga MLA chuan Young Mizo Association (YMA) Zobawk Vengthar Branch Golden Jubilee lawmna chu Khuallian niin a hmanpui.

Khuallian Pu V. Malsawmtluanga chuan Branch YMA Golden Jubilee chhinchhiahna lungphun a hawng a. Jubilee lawmna inkhawmah thu sawiin, Branch YMA member lo ni tawhte leh ni mekte chibai a buk bakah, Branch YMA sul sutute zahna chibai a buk bawk a. YMA chu Mizorama tlawmngai pawl lian ber a nih angin member tawh phawt chu 'phut let nei lova mi dang tana inchhi ral ngam' turin a fuih a. YMA chu kohhran bil leh pawl bil awm lova lungrual taka tel theihna a nih avangin ṭhalaite chu theih tawpa inhmang zel tur leh an thiamna leh theihna te pawh YMA tana hmang zel turin a chah a ni.

Pu V. Malsawmtluanga chuan Zobawk South thlanmual kawng chu HPC fund-a PCC a nih tur thu sawiin, Article 275 aṭangin Auditorium sak a nih tur thu a sawi bawk a. Zobawk chu Mizorama lui sei ber leh Zoram mipuiin kan tlan ber Tlawng hnar awmna a nih avangin Mizorama khaw pawimawh berte zinga mi a nih thu sawiin, tui hna siamtu ramngaw tichereu lo va, humhalh tlat turin khawtlang mipuite a chah a. Mizoram sawrkar ruahmanna, Bana Kaih (Hand Holding) scheme chu ṭangkai taka hmangtu ni tur leh hlawhtlinpuitu ni ngei turin khawtlang mipuite a chah bawk.

Vawiina Golden Jubilee lawmnaah hian Lunglei Sub-Headquarters YMA President Pu K. Lalfakzuala chu khual zahawm niin, khual zahawm hian YMA Run thar a hawng thung a ni.

YMA Zobawk Vengthar Branch-ah hian member mipa 440 leh hmeichhia 193, an zavaiin member 633 an awm mek a. Golden Jubilee lawmna hi Ni 14.11.2024 (Ningani) zan aṭang khan hman ṭan niin, zanin hian a ṭiak ang.