3038/2024-2025

2024 Sahmulphah thla ni 15: Hon'ble Prime Minister Pu Narendra Modi chuan vawiin chawhma dar 11:00 khan Jamui, Bihar aṭangin India rama RD block hrang hrang 10-a Eklavya Model Residential School (EMRS) thar hawngin, RD block 25-a EMRS sak thar tur lungphum a phum bawk a. Hawn thar zingah hian Mizorama EMRS pahnih - EMRS Bilkhawthlir (Bilkhawthlir RD Block, Kolasib District) leh EMRS Noaohtlah (Siaha RD Block, Siaha District) te telin, sak belh turah EMRS panga - Lungsen (Lungsen RD Block, Lunglei District), Khawbung (Khawbung RD Block, Champhai District), Khawzawl (Khawzawl RD Block, Khawzawl District), Sawleng (Darlawn RD Block, Aizawl District) leh West Phaileng (West Phaileng RD Block, Mamit District) te an tel bawk a. He hun hi Lunglei DC Office Video Conference Hall aṭangin Social Welfare, Tribal Affairs, Women & Child Development Minister Pi Lalrinpuii hovin virtual mode-a chhim a ni.

Minister Pi Lalrinpuii hova Mizorama EMRS sak thar hawn leh sak leh tur lung phum hriatpuinaah hian Lunglei District Bawrhsap Pu R. Lalṭhazuala, Superintendent of Police Pu J. Lalmuankima, Lunglei Municipal Council (LMC) Vice Chairman Pu K. Lalrinawma, SW&TA Joint Director & Mizoram EMRS Society Joint CEO Pi Ruth Vanlalsawmi te bakah, line department hrang hrang official-te, khawtlang hruaitu, tlawmngai pawl leh MJA ai awhte an tel a. Minister Pi Lalrinpuii chuan Mizorama EMRS sikul building thar changtlung tak pahnih hawn a ni leh a dang panga sak leh tur lungphum phum a ni chu lawmawm a tih thu sawiin, Hon’ble Prime Minister, Hon’ble Minister of Tribal Affairs leh NESTS te chungah lawm thu a sawi a. EMRS kal tlangin Mizorama tribal zirlaite'n zirna kawnga hmasawnna tluantling an hmuh a, ram puma lang phaa an intar chhuah theih zel a beisei thu a sawi.

National Education Society for Tribal Students (NESTS), Ministry of Tribal Affairs-in India ram chhunga scheduled tribe zirlaite’n zirna chhenfakawm tak an neih theihna tura a hma lakna pakhat, Eklavya Model Residential School (EMRS) hi Mizoram-ah Social Welfare & Tribal Affairs enkawlna hnuaiah kalpui niin, Mizoram EMRS Society-in a enkawl a ni a. EMRS hi India ram state hrang hrang chhunga block level-ah mipui chengte 50% scheduled tribe an nihna hmuna mihring chengte zingah, mi 20,000 aia tlem lo scheduled tribe awmnaah te din theih a nih angin, Mizoram chhungah pawh RD Block hrang hrang hmun 17-a dinna tur hmuh fel tawh a ni a. Hmun ṭhenkhatah sak zawh tawh niin, ṭhenkhatah sak mek a ni chungin school kal ṭanpui tawh a ni bawk a. Tunah hian EMRS 11 chu zirlai (Class VI - XII) neiin kalpui mek a ni a. A dang 6 te hi tun hnai maiah NESTS atangin sanction hmuh niin, sak thuai turin chak taka hma lak mek a ni bawk.

EMRS hi chen chilha zirna (residential school) a nih angin zirlaite tan ei leh in, uniform leh zirnaa an mamawh eng kim a thlawn veka pek an nih bakah, national level sports leh cultural activities te neihpui ṭhin an ni a. State dang EMRS-te nen India ram khawpui hmun hrang hrangah hun hman ho ṭhin a ni.