1332/2024-2025

2024 Vawkhniahzawn thla ni 26: Vawiin khan Lunglei South Bialtu MLA Pu Lalramliana Papuia chuan Mizoram Polytechnic Lungleiin zirlai tharte lawmna hun, "Freshers' Social" an buatsaih chu Khuallian niin a hmanpui.

Mizoram Polytechnic Lunglei Multipurpose Hall-a Freshers' Social hun hmanah hian Khuallian Pu Lalramliana Papuia chuan Mizoram Polytechnic Lungleia thawktute leh zirlaite chibai bukin, Mizoram hmun hrang hrang aṭanga zirlai fuan khawmte hmaa hun a hmang thei chu lawmawm a tih thu a sawi a. Sawrkarin hand holding policy a kalpui turah skill development leh technical education chu a hlawhtlinna hriltu pawimawh tak a nih dawn avangin ITI leh Polytechnic institution-te thuam thar leh ngaihsak a ṭul hle dawn a ni tiin, zirlaite pawh sawrkar policy tihpuitlinna hmanraw pawimawh tak an ni dawn tih hria a, an zirlaiah theih tawp chhuah turin a fuih a. Kut hna thawktute'n tun lai thiamna (advanced technology) hmanga hlawkpui tham thar chhuah an neih theih nan hma lak a ṭul thu sawiin, chumi atan chuan zirna ṭha a pawimawh tih a sawi a. Vanneih avanga mi ropui leh langsarte khawvel ngaihsan an ni ngai lo va, thawh rimna leh tum ruhna avanga ding chhuakte khawvelin a ngai ropui zawk ṭhin tiin, zirlaite chu retheihna chhuanlama hmang duh miah lo zirlai tum ruhte an ding chhuak ṭhin tih hria a, mahni infuih thar nana hmang turin a chah a. Social media khawvela ngaihsan tur zawnga hmanhlel, mi hman lutuk an ding chhuak ngai lo tih sawiin, mi dang buaipui lova mahni hnaa insawrbing ṭhin mi an ding chhuak ṭhin a, chuti ang mi chu mi ropui leh mi larte'n an ngaihsan let zawk mihring an ni ṭhin tih thu hmangin zirlaite a fuih bawk.

Mizoram Polytechnic Lunglei Freshers' Social-ah hian Students' Union (SU) Vice President Lalthantluanga chu chairman niin, Ricky Lalpekhlua chu host a ni a. Mechanical Engineering Head of Department Er F. Ainghinglova'n hunserh hmangin, SU General Secretary Malsawmsanga Fanai chuan report a pe a. Humanities & Science Head of Department Miss Lalbiakveli'n 1st year zirlaite hmelhriattirna hun hmangin, Principal Er Lalnuntluanga'n inlawmna thu leh zirlaite fuihna thu a sawi a. Mizo Zirlai Pawl (MZP), Headquarters, Lunglei leh Mizo Students' Union (MSU), Regional Headquarters, Lunglei ai awhte hnen aṭangin thu sawi ngaihthlak a ni a. Zirlaite aṭangin malzai leh hnam lam te ngaihthlak leh thlir ho a ni a. Chairman Lalthantluanga'n lawm thu sawiin hun a khar a ni.

Mizoram Polytechnic Lunglei hi kum 1981 khan Mizoram sawrkar hnuaiah din niin, Mizoram State Council for Technical Education (MSCTE) hnuaia inziak lut leh All India Council for Technical Education (AICTE)-in a pawmpui zirna in a ni a. Tun dinhmunah department panga - Civil Engineering, Mechanical Engineering, Electrical Engineering, Computer Science & Engineering leh Humanities & Science te awmin, 1st year aṭanga 3rd year zirlai 270 vel an awm mek a ni.