1333/2024-2025

26th July, 2024 : Mizoram Sorkar hnuaia Taxation Department leh GSTN tangkawp chuan ni hnih awh GST Training, dt. 25-26 July 2024 chhungin an buatsaih a. He hunah hian Tax officer ten chhiah pe tha duhlote chunga hmalak dan an zir a ni. Training pe tur hian GST Council in GST system siam tura mawhphurhna a pek, Goods and Services Tax Network (GSTN) Headquarters, New Delhi atangin trainer pathum an lo kal a, Taxation Department Auditorium ah training hi neih a ni.

Training hawnna inkhawmah Pu R Zosiamliana, Commissioner of State Tax chuan Mizoram Sorkar-in sum harsatna a tawh mek dante, Taxation Department chu Mizoram Sorkar hnuaia revenue laluttu Department zingah a thawh hlawk ber anih thute sawiin, Tax Officer te chu thahnemngai turin a fuih a. Pu C Vanlalchhuana, Joint Commissioner of State Tax & GST Nodal Officer in training programme buatsaih anih chhan leh a pawimawhnate sawiin, India rama GST software chungchanga trainer tha ber ber leh a software siamtute an chahchhuah theih avanga lawmawm a tih thu a sawi bawk a ni. GSTN mi leh sa training pe tura lokalte hi Pu Sateshwaran KB, Associate Vice President (AVP) Services, Pu Vishal Goel, Senior Consultant leh Pu Rishabh Aggarwal, Senior Consultant te an ni.

A ni hnihnaah he GST Training kharna hun hi Dr. Vanlalthlana, Hon’ble Minister, Taxation in certificate semna te neiin a hmanpui a. Minister hi Pu S.M. Ali, IAS, Secretary, Taxation Department in a tawiawm a ni.

He training ah hian GST Dan hnuaia Enforcement leh Audit zir ho a ni a. Chhiah hi mipuiten kan thil leina manah kan pe tel a, heihi GST Dan hnuaia chhiah petu (Registered Taxpayer) ten kim takin thla tin emaw, thla tum danah emaw, sorkarah an chhung lut tur a ni a. An chhun luh loh emaw, an chhun luh kim loh emaw hian sorkar-in mipuite a enkawlna tur sum a hmuh tur zat a hmuh loh phah thin a. Mipui pawisa hetia chhiah petuten an lo kawl khawtlai thin hi GST Dan chuan a ngaih thutak hle a, a hremna pawh a na hle a ni.

    GST Dan hnuaiah hian chhiah petuten an pek dik leh dik loh endik tura a ruatte chu Taxation Deparment Officer-te hi an ni a. State Tax Officer atanga Commissioner of State Tax thlengin GST Dan hmangin mawhphurhna pawimawh tak tak pek vek an ni. He training a an zir, GST Enforcement hnuaiah hian Tax Officer te hi chhiah lakna bungrua khawi hmunah pawh endik theihna turin thuneihna pek an ni a. Bungraw phurtuten document felfai an neih loh chuan an bungrua leh a phurtu motor thlengin man (detain) theih an ni a. Tin, chhiah petuten an pek dik leh dik loh enfiahna dan, GST Audit hnuaiah hian dawr hmun mai bakah kudam (warehouse) endik theihna turin Tax Officer te hi thuneihna pek an ni bawk. Pe kimlo emaw lo awl ru emaw an awm tih hmuhchhuah anih chuan an chhiah pek kimloh/awl ruk bakah penalty leh interest te pek tel a ngai thin a. An pe duhlo anih chuan GST Dan in a phal angin an thil neih (property) hrensak/lilam sak theih an nih bakah an bank account thlengin tih thih lailawk (freeze) theih a ni bawk.