1334/2024-2025

Dated Serchhip, the 26^th July, 2024: Vawiin khan Serchhip DC Pu Paul L.Khuma hovin Serchhip DC Meeting Hall-ah Independence Day 2024 Serchhip khawpuia hman dan tur rel a ni.

Serchhip Bawrhsap Pu Paul L.Khuma chuan “India ram zalenna ni Independence Day hi a ropui a, he zalenna sual chhuak tur hian mi tam takin nunna an chan a; ropui, mawi leh zahawm taka lawm hi a phu em em a, chutiang ang taka kan hman theih nan Committee Member ten ngaihtuahna i seng ang u”, tiin a sawm a. Kum tina lawm thin a nih avanga ngaiah neih mai lovin, fimkhur leh uluk taka ruahmanna siam a tul thu te; he ni puala mimal, pawl leh department hrang hrangin mawhphurhna kan neih te tha taka hlen chhuak theuh turin DC chuan kalkhawm te a sawm a ni.

Kumin Independence Day lawmna chu Serchhip Sports Complex ah chawhma dar 10-ah neih ni se tiin meeting chuan a rel a, Minister Pu C. Lalsawivunga chu khuallian a ni ang. Parade Contingent atan school contingent 14, Scouts and Guides, NCC, Assam Rifles Pipe Band leh Ex-Servicemen te tel thei tura beisei an ni a. Parade contingent te hian August ni 8 atangin parade ground ah ni thum chhung an zir a nga, final rehearsal hi August ni 13 ah an nei dawn a ni. Independence Day denchhen hian Home hrang hrang bakah Hospital leh District Jail ah te tanpuina pek a ni dawn a. Hemi ni hian Sawrkar Building zawng zawngah hnam puanzar (national flag) zar vek a ni dawn bawk a ni.

DC Pu Paul L.Khuma chuan Independence Day 2024 lawmnaah hian mipui a tam thei ang ber kalkhawm turin a sawm a, a bik takin sawrkar hnathawkte chu an mawhphurhna a ni tih hria a, a lawmna programme-ah hian tel ngei turin a hriattir a ni.

Meeting-ah hian Serchhip District chhunga Department hrang hrang hotute bakah Assam Rifles, BSF, chanchinbumi te, khawtlang hruaitute leh tlawmngai pawl aiawh te an tel a ni.