No.904/2020-2021

Vawiin khan Lunglei District SP thar Pu Stephen Lalrinawma chuan a Office Chamber-ah Lunglei District media mi te kawmin inhmelhriatna hun an hmang. Lunglei District MJA member-te an President Pu H. Lalthansanga hovin he inkawmhona ah hian an tel a ni.

Lunglei SP thar Pu Stephen Lalrinawma chuan Lunglei District chu District lian leh mihring tamna, international boundary nei bawk a nih avangin venhimna lamah pawh tha thlah lova thawh a tul tih a sawi a. Chak zawka police hna a kal theih nan chanchinbu mite chu dan leh thupek kenkawh kawnga hmalak puiah sawmin police-te finchhuah thin turin a sawm a ni. Media mi te chu thudik tan tlat a, thlei bik nei lova thu puang darh thin tura fuihin mipuite sukthlek siam sak tu leh mipui rawngbawltu pawimawh tak an ni tih hre thar turin a chah a ni.

SP chuan Lunglei khawpui chhunga lirthei che vel chu tunhma ngaihtuahin a tawt chak hle a, nakin hun thlir a tun atanga lirthei chet vel dan mumal zawka ruahman tum a nih thu a sawi bawk a ni. Lunglei khawpui alo him zawk theihna tura cheng vaibelchhe 1.50 senga HPC kaltlanga ruahman ‘Lunglei Town Surveillance (CCTV) Project’ nikum November thlaa hman tan pawh tangkai taka hman mek a nih thu a tarlang.

Lunglei District MJA President Pu H. Lalthansanga leh member dangte pawhin thu sawiin an thil ngaih pawimawh leh mamawhte SP hnenah an thlen a, ram leh hnam, District hmasawnna tura lungrual taka hmalak tlan an duh thu an sawi a. Media mi te nena inhmelhriatna hun tha tak a buatsaih avangin SP chungah lawmthu an sawi a, media mite tana inhawng taka hnathawk duh mi a nih naah a chungah lawmthu an sawi bawk.

He inkawmhona hunah hian Lunglei Additional SP thar Pu Jacob Hlychho, SDPO Pu F. Vanlalrochana leh official dangte an tel a ni.