Vawiin chawhnu khan Career and Counseling Cell, Lunglei Government College buatsaihin LGC Multipurpose Hall-ah Career Guidance Seminar neih a ni. Lunglei District Superintendent of Police Pu Lalthafamkima Jongte, MPS leh Lunglei District I&PR Officer Pi C. Lalremruati, MIS te chu Resource Persons niin ‘Career Opportunities in the Civil Services’ tih thupui hmangin college zirlai rual kalkhawmte zirtirna an pe.

Pu Lalthafamkima Jongte chuan ‘Career Guidance – Uniformed Services’ chungchang zirlai kalkhawmte a zirtir a. Police lama hna hrang hrang awmte leh heng hna zawm tura qualification mamawh leh exam paltlang ngaite a sawifiah a. Zirna leh eizawnna kawngah zirlaite chu anmahni theuhva an inhai chhuah a la tul dawn a ni tiin thahnem ngai tak leh rilru nei taka inpuahchah chho turin a chah a.  Kum tam tak police officer hna a thawh chhunga a thil tawn hrang hrang te Lunglei SP chuan zirlaite a sawipui bawk.

Pi C. Lalremruati chuan UPSC, MPSC leh SSC hnuaia exam hrang hrang leh heng exam hmachhawn tura inpuahchah dan tur tlangpui zirlaite hnenah a sawifiah a. Zirlaite chu an hma hun thlir ran leh rilru nei tak chunga ‘career goal’ siam fel tur leh chumi lam hawia ngawrh taka inbuatsaih chho turin a chah a. Central sawrkar hnuaiah kum tin hna ruak tam tak a awm thin ani tiin Lunglei DIPRO chuan heng competitive exam bei ve turin zirlai kalkhawmte a chah bawk.

Hemi hnu hian zawhna leh chhanna hun leh sawihona hun hlawhtling tak hman zui nghal a ni. 

Attachment

  • Loading attachment...