Nimin chawhnu khan Lunglei SP thar Pu C. Lalthanmawia, MPS chuan a office chamber-ah Lunglei District media mi te inkawmhona a neihpui. Lunglei District MJA member-te an President Pu H. Lalthansanga hovin he inkawmhona ah hian an tel a ni.

Pu C. Lalthanmawia chuan Police ten hna chak zawka an thawh theih nan mipui tawiawmna leh tanpuina kan mamawh thin tiin Police te chu dan kengkawngtu an nih angin dik tak leh fel taka dan an ken kawh a ngai a ti a, mipuite pawh dan ang taka chet a tul thu leh chu chuan misual chhui leh hrem kawngah nasa takin police te a pui thei tih a sawi. Hmun tinah Police indaihlohna a nasa hle a, dan kenkawh chungchangah pawh mipui hnenah Media mite pawhin chanchin hrisel leh dik zawk kan thehdarh thiam a tul hle tih sawiin Social Media hmandan mipuiin kan zir a ngai hle a ti a. Lungleiah pawh Cyber Crime thubuai 2 a awm mek thu sawiin sual do kawngah mipui tana thawk an nih mek laiin mipui tawiawmna chuan an hna a ti chak  thei tih a sawi bawk. SP chuan Lunglei khawpui chhunga lirthei che vel chu tunhma ngaihtuahin a tawt chak hle a, nakin hun thlir a tun atanga lirthei chet vel dan mumal zawka ruahman tum a nih thu a sawi bawk a ni.