Vawiin chawhma khan Aijal Club Conference Hall-ah Mizoram State Higher Education Council(MSHEC) chu Higher & Technical Education Minister Pu R.Romawia, MSHEC Chairman ni bawk kaihruaina hnuaiah thu pawimawh relin an thukhawm.
SHEC Meeting kaihruaitu Higher & Technical Education Pu R.Romawia chu kawng hrang hrangah zirlaite hmakhaw ngaiin zirna in sang zawkte tihhmasawnna hna Mizoram sawrkarin a thawh mek te leh hemi kawngah hian SHEC chu mawhphurhna sang tak neitu a nih thu te a sawi a. SHEC Council member te, Rastrya Uchchatar Shiksha Abhyan office a thawkte leh Mizoram Higher & technical Education Department enkawl College hrang hranga Coordinator-te inpekna avangin Mizoram chhunga college tinah hmasawnna duhawm tak tak hmuhtur a awm tawh a ni a ti.
SHEC Meeting vawi 6-naah hian SHEC Vice Chairman leh RUSA State Project Director Pu Asish Kundra, Commissioner & Secretary, H&TE chuan huntiam chhunga Mizoram in hmachhawp a neih te sawrkar laipui hnena thehluh tura tanlak mek a nih thu te leh RUSA tanpuina sum dawng thei tura college te tana National Assessment and Accreditation Council (NAAC) Accreditation neih a tul thute bakah Mizoram college zingah zirlaiten luh an chak zualna tur bik, a subject a zira college tha filawr bikte an awm theih nan tehna leh tehfung rintlak(benchmarking of colleges) siam a pawimawh thu te a sawifiah hmasain SHEC meeting atana thurel tur chhawpchhuahte - Draft State Higher Education Plan(SHEP) and Proposals under RUSA 2.0, Government leh Central Government ten RUSA 2.0 atana thawhhona thuthlung an lo ziahdun chungchang, Mizoram State Higher Education Act, 2017 leh a kaihhnawih dan siam chungchang, Mizorama Autonomous College te kalpui a nih hun atana NAAC Guidelines chungchang te, Mizoram College hrang hranga Post Graduate zirna hawn tumna chungchangte, College thaber/ zirtirtu thaber leh Subject pakhat bik zirna(Department ) thaber thlanchhuaha lawmman pek tumna chungchang te leh Admission system pakhat intawm leh Online kaltlanga Admission dilna thehluh chungchangte chu SHEC member te chuan ngaihtuahho a ni.
SHEC Member Secretary Pu Thanglura Report atanga a lan dan chuan - MIzoram State Higher & Technical Education hnuaiah Sawrkar College 24 a awm a; heng zinga 12 hi Aizawl District a awm a ni a, a bak chu Lunglei district-ah 3, Champhai District-ah 2, Lawngtlai District-ah 2, Mamit District-ah 2, Kolasib District ah 1, Saiha District-ah 1 leh Serchhip District-ah 1 an awm a ni. Kum 2016 -2017 chhung khan Mizoram pumpuiah College zirlai 14,393 an awm a; heng zinga 7429 chu mipa niin hmeichhia 6964 an awm a; Arts subject la zirlai awm zat chu 11,698 an ni a, Science Subject zir chu 858 chiah niin mi 541 in Commerce subjects an zira a bak chu Law, Computer leh a dangte an ni thung.
RUSA 1.0 hnuaia hmalakna tarlan a nih dan chuan RUSA - Component No.18 - Preparatory Grant & MMER, Componet No.7 - Infrastructure Grants to Colleges, Component No 5 - Upgradation of existing colleges to Model Degree Colleges, Component No 6 - New professional College leh Component no 9 - Equity Initiative hnuaia RUSA chuan Rs 87.06 Crore neiin Rs 84.66 Crore a hmang tawh a; Component No 10 - Faculty Recruitment Support - Rs 12.528 Crore awmna chu RUSA PAB in a pawm tawh a hmalak mek a ni. MIzoram State Higher & Technical Education hnuaiah Sawrkar College 24 zinga 21 te chu NAAC accredited an ni tawh a; hetih lai hian College 3 - Govt. Mizoram Law College, Govt. Kalamanagar College leh Govt. Hindi Training College te chuan NAAC hnuaia Grade & Cumulative Grade point Average(CGPA ) neih tumin an inpuahchah mek a ni.
