Vawiin chawhma dar 9:30AM khan MYA Hall-ah Mizoram Youth Commission bultumin ‘Youth Summit & Road Show’ Siaha-ah hlawhtling taka hman a ni.

Vawiin programme hi Pu James Lalnunmawia, Addl. D.C. in a kaihruai a, Pu  N.Zakhai CEM, MADC chuan khuallian niin he hun hi a hmanpui a ni.

Vawiin Youth Summit & Road Show neihna a Khuallian Pu N. Zakhai, CEM, MADC chuan thu sawiin, hetiang  programme pawimawh em em Siaha khawpui a nghah a ni hi a lawmawm hle a ni, a ti a. A buatsaihtute leh kan Mizoram Youth Commission Chairman Pu Joseph Lalhimpuia chungah pawh thinlung takin lawmthu ka sawi a ni, a ti a, kan ram thalaite eizawnna leh zirna kawng hrang hrang a hmasawnna tur programme hi a ram thalaite hian ngaithah mai lova, chona a ngai a hlawkpui ngei turin kalkhawmte chu chahin duhsakna a hlan bawk  a ni. Vawiin a he programme lo chhimtute hian a chhim ve lote hnenah pawh puangzar zel tura sawmin, Mizoram Youth Commission hi hmang tangkai theuh turin a chah hlawm bawk.

 MYC Officer Pu Ronald Lalchhuanawm pawhin Key Note Address sawiin, MYC ten Mizoram thalaite eizawnna leh zirna kawnga hma an sawn theih nana an hmalak tawhna leh hmachhawp hrang hrang te a tarlang bawk. Niminah khan Pu Ronald-a leh a thawhpui Aizawl atanga lo kalte chuan Siaha Chanchinbu mite kawmna hun hmangin, MYC in Mizoram thalaite tana an hmalakna hrang hrang leh hmachhawp te sawiin, MYC kaltlanga  Siaha District Thalai ten hamthatna hrang hrang an hmuh theihte chu chipchiar taka puanzarh sak turin an lo ngen tawh bawk a ni.

He Youth Summit & Road Show chhimtu mipuiten awlsam zawka MYC hmalakna hrang hrang an hriat theih nan Stall 16 (sawm leh paruk) hawn niin, zirlaite hmakhua tur chi hrang hrang pholan a ni bakah harsatna leh zawhna neihte tan pawh a hmunah chhan nghal zel a ni bawk. Tunhnai a MYC kaltlanga Air Hostess leh Cabin Crew an lak tharte pawhin Stall thutchilhin mipui te atanga zawhna hrang hrangte an chhang zel bawk a ni. Tin, Painting & Arts Exhibition te chhawpchhuakin, mahni thlalak ziahtirna Stall phei chu mipuiten an bawrh nasa hle a ni.

Vawiin Youth Summit & Road Show programme a MYC Stall hrang hrangte hi nilenga hawn a ni a, Siaha District thalaiten an hlut in an hlawkpui hle a ni. Pu T. Chatlua, Nodal Officer chuan lawmthu sawiin he programme hi a titawp a ni.