Tlawng luihnar a kam chak avanga Greater Lunglei Water Supply Scheme (GLWSS)-in Lunglei chawm tur duh anga tam tui pump tur a hmuh loh leh khawl thawmthat a nih nana hmalak dan tur enfiahin vawiin khan PHE Minsiter Pu Zodintluanga chuan GLWSS Pialthleng a hmunah a tlawh a ni.

Kum 1995 November ni 22-a Chief Minister Pu Lal Thanhawla-in a hawn GLWSS khawlte hi a tir atanga thlak miah loh a nih avangin a hluiin pump theih loh thut dinhmunah a ding a. PHE Minister Pu Zodintluanga chuan tun sorkar kum (Financial Year) chhung ngeiin a pawimawh zual laite a rang theih ang bera thlak turin hma a lak tur thu a sawi a. India rama ‘Single Phase Pump’ sang ber GLWSS tui lakna Tlawng hnar hi a kang chak em avangin ni khata Lunglei chawm tura darkar 16 tui pump ngaihnaah tunah hian darkar 8 chauh pump tur a tlingkhawl thei a, hei vang hian tuikhuahna thlanga Pialthleng lui tui chu tuikhuahah hian pump belh thin a ni a. Hetiang harsatna hi sutkian a nih theih nan lui hnar lamah ‘recharging dam’ siamna tur survey a ni mek bawk a ni, a ti.

GLWSS-a khawl Vertical Pump leh pump-na khawl dangte chu kum 19 vela upa an ni tawh avangin chherup thei dinhmunah a ding niin PHE thawktuten an sawi a; Minister chuan a thei anga ranga a thara thlak a nih tur thu a hrilh a ni. PHE khawl siamthat chungchangah Minister chuan engineer-te siamthat theih thil a nih thu sawiin hemi kawnga a thiam bikte chu GLWSS harsatna zawngchhuaka siamtha turin ruahmanna siam nghal a nih tur thu a sawi bawk.

Kawlphetha an dawn atanga tui pump tura harsatna an tawh thin chungchang sawifiahin P&E SE (Southern Circle) Pu R.Lalrema chuan PHE leh P&E Department te inkarah thawhhona leh inbiakpawhna tha neih a tul thu Minister a hrilh a. Kawlphetha an hmuhdan leh a ‘frequency’ a zirin P&E chuan a sem rual thin thu leh tui pump a tul hunah chuan inhrilhhriat vat a, PHE mamawh kawlphetha pek chu ruahman thei a ni tih a sawi bawk a ni. Tui pump-na tana kawlphetha kalkawng tha lote endik turin MRT EE leh a hote sawmin a thatlohnate tihthat a nih chuan harsatna an tawhte sutkian a nih theih thu leh hemi atan hian PHE Department chuan Rs.50,000/- tal hnathawh nan pe thei se tih Pu R.Lalrema-in a sawi chu PHE Minister chuan a rang thei ang bera hemi chungchangah hmalak a nih tur thu a sawi nghal a ni. Heng harsatnate avang hian 132KV Sub-Station-II Kawmzawlah bun turin rawtna thlen mek a nih thu Pu R.Lalrema chuan sawiin, a hma thei ang bera he Sub-Station-II tipuitling tura ngenna Minister hnenah a thlen chu Pu Zodintluanga chuan theihtawp a chhuahpui tur thuin a chhang a ni,

PHE hnathawktute chuan P&E nena an inbiakpawhna kawngah mobile signal a awm loh avangin harsatna an tawh thin tih an sawi a, tui tha taka pump tur chuan Khawiva-a PHE hnathawkte nena inbiakpawhna tha tak neih a tul thu an hrilh chu Minister chuan hemi chungchangah pawh hmalak vat a ni ang, a ti.

GLWSS-ah hian thawktu mi 34 awmin mi 17 zelin kar khat danah an inriah luh chhawk thin a, tui hi a hma berah dar 9:30PM vel atanga pump theiin, mi pakhat hi zan 2 aia tlem lo tlaivar ang ziah an ni.

Vawiina Pialthleng hmun a tlawhnaah PHE Minister Pu Zodintluunga hi PHE SE Pu Anoop Chhetri, P&E SE Pu R.Lalrema, chanchinbumite leh heng Department pahniha hnathawk engemawzatin an tawiawm a. GLWSS-a thawktu hrang hrang ten an hnathawh dan leh harsatna an tawhte meeting-ah hian Minister hnenah an thlen a. Power lama harsatna an tawhte sutkian dan tur an sawiho nghal bawk a ni.

Attachment

  • Loading attachment...