Chief Minister Pu Lal Thanhawla hovin vawiin chawhnu khan NLUP Conference Hall ah All Minister Meeting leh NLUP special meeting neih a ni. Meeting hnuhnung zawkah hian UN technical Mission team lokal tur te lo dawnsan dan tur rel a ni a.NLUP meeting bikah hian NLUP hmalakna leh kalphung thenkhat siam rem ngaite ngaihtuah ho a ni thung.

Meeting kaihruaitu Chief Minister chuan NLUP hmangin UNO kawngka pui kan kik hawng tawh a ti a. NLUP hian tunlai khawvel buaina hrang hrang - global warming, environment chhe tawh siam thatna tur te leh leihnuai tui kang mek zel siamthat hna te tha taka a kalpui mek ni a hria in UN agency 5, FAO, ILO, UNDC, UNIDO leh IFAD a hotute leh mithiam te chuan Mizoram sawrkar nena thawhho dan kawng dap in Mizoram an rawn tlawh dawn a. Mizoram sawrkar pawhin heng mithiam rual te tha tak leh awmze neia kan lo dawnsawn a kan lo dawr a ngai dawn a ni a ti. Heng mithiam 9 lo kal turte hriatthiam turin Mizoram ei leh barkawnga intodelh dan tur bakah sum leh paia hmasawnna project hrang hrang te UNO project hnuaia thawh a nih theih nan kawng awm thei ang ang kan lo ngaihtuah lawk a ngai a.Department hrang hranga hotute pawh he mi lam hawi hian an ngaituahna lo seng lawk tur leh ruahmanna lo duang lawk turin a chah a ni.

All Minister meeting neih hma a thukhawm NLUP Special Review meeting ah hian NLUP sum dinhmun, beneficiary te thlen chin leh line department te hmalakna te zirchianna a ni a. He meeting ah hian AH&Vety leh Horticulture department hnuaia NLUP trade kalpuina a siamrem ngai lai te bih chian a hmalak chhoh zel dan tur rel a ni. Chief Minister chuan Department hotu tam tak, an tanpui tur mipui leh kuthnathawktu te chanvo, sawrkar tanpuina sum leh khawl hmang te a mahni in leh lo bak a an huan hial te enkawl an awm nual tih hriat a ni a. He thil hi an tih tawp nghal a ngai anga, an mahni hamthatna ngaihtuah hmasa lovin an enkawl tur mipuite leh kuthnathawktute hamthat nan an hun pumpui bakah an kut a awm sawrkar sum leh bungruate anhmang zawk tawh tur a ni ti.

Meeting ah hian Minister zawng zawngte, Vice Chairman, State Planning Board, Chairman, NIB, Chief Secretary leh Vice Chairman & CEO, NIB te an tel a ni.