Nimin (30.4.2014)-a AIR-a Inter Media Publicity Co-ordination Committee (IMPCC) thukhawm chuan tui harsatna te, sikserh do chungchang leh Lok Sabha inthlan result puan chungchangte an sawiho.
Pu C. Lalrosanga, Addl. Director General (P), NER, AIR & Doordarshan, Guwahati hova IMPCC thu khawm chuan tunlai kangmei chhuak leh tui harsatna hmun hrang hranga thleng mekte an ngaihmawh thu sawiin, kangmei laka fimkhur tura thu leh hla thehdarh chhunzawm zel an rel a. Tunlaia tui harsatna thleng mekte leh fur ruahtui la tla turte thlirin “tui thianghlim khawl leh renchem” tih chu tun thla thupuia hman an rel.
He meeting-ah hian Lok Sabha inthlan result May ni 16-a puanzar dan turte sawi hovin, All India Radio leh Doordarshan kaltlanga a zau thei ang bera inthlan result puan nise an ti a. Mizoram chhung mai nilovin, state hrang hranga inthlan result chhuakte pawh a tam thei ang bera puandarh a rel bawk.
Malaria dona lama hmalak dante meeting-ah hian sawi tel a ni a. Kumin chhungin Mizoramah Malaria vanga thi an la awm lo chu lawmawm an tih thu an sawi bawk. May ni 3 (Inrinni) hian Mizorama gas zawn leh laihchhuah chungchanga DDK Aizawl buatsaih documentary film chu Aizawl Chanmari YMA Hall-ah tlangzarh tura rel a ni bawk. els
