Vawiin khan Govt. J.Buana College-a Department of Political Science & Public Administration leh HATIM, Lunglei tangkawp chuan UGC bultumin I&PR Conference Hall, Lunglei Bazar Veng-ah ‘National Seminar on Millenium Development Goals (MDG) and Northeast India’ an huaihawt a, Lunglei D.C. Pu Ashish Madhaorao More, IAS chu Khuallian chan changin Seminar hi a hmanpui a ni.

He Seminar Dr.Harendra Sinha, Associate Prof. & Head, Department of Pol. Science kaihhruaiah Pu Ashish More chuan thu sawiin India hmarchhak bial leh ram hmun dang thenkhatte chu a ram lailite (central regions) aiin hmasawnna lamah an thuanawp deuh a, hei hian chhan tam tak nei thei a - chung zingah chuan British hovin India hmun laili zawkte chu kum 300 lai an awp hman laiin hmarchhak bial hi chu kum 50 vel chauh an enkawl hman vangin hmundang angin an tichangtlung hman lo a ni thei, a ti a. Hei bakah hian sorkar laipui pawhin engemawchen chu hmarchhak bial hi a ngaihthah deuhna lai pawh a awm thei a; hmasawnna atana pawimawh thil tam tak - kawngpui tha te, kawlphetha te leh inbiakpawhna lamte pawh he bialah hian a lut har zawk a ni, a ti. Amaherawhchu tunlai khawvel Information Technology-in a tuam hneh em em tawhnaah hian mipuite leh a bik takin thalaite hi bum theih an ni tawh lova, an hriat duh zawng thilte chu awlsam leh rang takin Internet hmangin an banphakah IT chuan a dah vek tawh a ni, a ti. Mizo thalai/zirlaite pawhin IT hman tangkaina chang hria a, hun lo kal zel turah zirna sang zawk um nan leh eizawnna tha zawk zawnchhuah nan hmang thiam turin a chah a. Hemi kawngah hian zirtirtute pawimawhna leh mawhphurhna a sang hle a, zirlai naupangte rilru leh tumna chawk tho tur leh kawng tha zawk lama an inel theih nan a hma aia nasaa fuih turin zirtirtute a chah bawk a ni.

Lunglei DC Pu Ashish More chuan thu a sawi zelnaah ram leh hnam hmasawn nana thil pawimawh berte zingah zirna leh thiamna (education), hriselna leh rilru/ngaihtuahna tihzau leh tihsan te hi kan ngaih pawimawh tel a tul hle a ni, a ti a. Ram hmasawnna kawngah sorkar leh ram hruaitute an pawimawh rual rualin a chhunga cheng mipuite rilru sukthlek, taimakna, thawhrimna leh thiamna chuan ram kal zel dan tur chu thui takin a nghawng thei a ni, a ti. Mizoramah phei chuan boruak muanawm leh dan leh thupek kenkawh lamah harsatna a awm lova, hei hi hmasawnna kalpui zelna atan duhthusam a ni a, chuvangin he state hian kawng tam takah entawntlak khawpin hmasawnna a seng lut thei a ni, a ti bawk.

He ni 2 awh tur ‘National Seminar on Millenium Development Goals and Northeast India’ hawnna inkhawmah Govt. J.Buana Principal & Patron Dr.J.Zorema pawhin thu a sawi a, Seminar-a tel zawng zawng ten an hlawkpui ngei turin duhsakna a hlan a ni. He Seminar-ah hian Mizoram leh state pawn atangin mithiam engemawzat an fuankhawm a, thupui then hrang hrang - ‘Rural poverty & hunger in NE’ te, ‘Status of women & health NE’ te leh ‘Policy measures towards MDG & NE India’ - tih hmangin zirtirna leh sawihona hun an hmang a ni.

Millenium Development Goals (MDGs) hi kum 2000-a United Nations Millenium Summit neihah khan duanchhuah a ni a, he Summit-a tel ram 193 te chuan kalpui an inhuam vek a, kum 2015 hma ngeia hlawhtlinpui an tum a ni. MDGs hnuaiah hian hmasawnna rahbi tur kawng 8 duanchhuah a ni a, hei hian a tum ber chu retheina leh tampui umbo, mi zawng zawng banphak zirna thlen, hriselna lam tihchangtlun, hmeichhe dinhmun chawisan, rilru hriselna lam enkawlna tha zawk bakah ram boruak, sik leh sa humhalh te a ni.