2759/2026-2027

Lunglei, 2026 Khuangchawi Thla ni 21: Vawiin khan DAO Conference Hall, Agriculture Complex, Lungleiah Lunglei West MLA Fund nena ṭang kawpa District Agriculture Office, Lunglei hnuaia NFSNM Scheme kal tlanga thlasik thlai chi leite sem chhuahna hun buatsaih chu Lunglei West bialtu MLA Pu T. Lalhlimpuia'n hmanpuiin, a dawngtute kutah chana chi a hlan.

MLA Pu T. Lalhlimpuia chuan kut hna thawktute'n thlai man hre saa phur taka hma an lak theih nan Mizoram sawrkarin thlai chi nga a man bithliah sa a neih thu sawiin, thlai tam zawk a man hre saa chin theih tur ngaihtuahin sawrkarin hma a lak leh mek thu a sawi a. Mizoram ei leh bara intodelhna tur leh mi rethei zawk leh kut hna thawktute chawi kan nan Mizoram sawrkarin Bana Kaih Scheme leh ruahmanna hrang hrang kal tlangin hma a la chho mek tih sawiin, tun ṭuma chana chi an sem chu MLA Fund leh Agriculture Department hnuaia scheme hrang hrang – NFSM, RKVY leh ATMA te nena thawh hona (convergence) hmanga hma lakna a nih thu a sawi a. Convergence chu sum hman dik kawngah leh hmasawnna tluantling atan a pawimawh thu sawiin, department mal hma lakna ni lovin, lungrual taka kut hnathawktute tana thawh hona a nih thu a sawi a. Rabi (thlasik) thlai, a bikin anṭam (mustard), be (pea), dailuah (lentil) leh chana (gram) te chu Mizoram tan thlai pawimawh tak a nih thu sawiin, Kharif (fur) thlai chauh ring lo va, Rabi-a buh leh bal tam zawk thar theih chu chhungkaw intodelhna leh sum lak luh tipungtu atan a pawimawh thu a sawi.

Pu T. Lalhlimpuia chuan chana chu lei tiṭhatu a nih thu sawiin, nitrogen a siam a, ram leilung tan damdawi ṭha tak a ni, a ti a. Tui a heh loh bakah, protein a pai tam avangin hriselna atan a ṭhat thu leh a man a to avangin kut hna thawktute sum lak luh tipungtu tur a nih thu a sawi a. Department-in thiamna leh ruahmanna, MLA Fund aṭangin sum leh kut hna thawktute'n tha leh zung an thawh khawmna aṭanga hma lakna hlawhtling tur a nih thu sawiin, Viksit Bharat leh Viksit Mizoram innghahna chu lo neitu, ṭhalai, hmeichhia leh mi retheite a nih angin kut hna thawktute chu a laimu an ni tih hria a, ram hmasawnna leh intodelhna atan ṭhahnem ngai taka thawk zel turin a chah a. Kut hna thawktute chu DAO leh a thawhpuite thurawn anga hma la a, thlai chin dan leh enkawl dan dik zawm tura chahin, kum tharah MLA Fund aṭanga a let tam zawk leh huam zau zawka hma lak chhunzawm zel a nih tur thu a sawi. 

Thlasik thlai chi semna hun hi Assistant District Agriculture Officer (ADAO), Lunglei Pi Lalthanmawii chuan a kaihruai a. DAO Lunglei Dr Samuel Lalliansanga chuan Lunglei District chhunga an hma lakna hrang hrang leh an hmachhawpte sawiin, kut hna thawktute hmasawnna tur leh buh leh bal tam zawk thar chhuak tura hma lak a ṭul thu a sawi a. Mizoramah a tlangpuiin ruahtui ringa thlai chin kan uar laiin, thlasik leh ṭhalah kan ram kan dah awl ṭhin tih sawiin, ram awl hman ṭangkai nan leh kut hna thawktute sum lak luh tipung turin thlasik thlai chin uar tura hma lakna kalpui a nih thu a sawi.

He hunah hian Lunglei District-a block tin aṭangin mi panga ṭheuh hnenah Lunglei West bialtu MLA Pu T. Lalhlimpuia chuan certified seed quintal 2 zel a hlan a. Khaw hrang hrang aṭanga thlasik thlai ching tur thlan chhuahte hnenah thlai chi hi sem chhuah chhunzawm a ni ang.

Thlai chi sem chhuahte hi IIHR Bangalore aṭanga variety ṭha – AP-3 leh Punjab-89 variety te a ni a. Thlai natna (powdery mildew) laka him niin, a thar tamin, a thar hma bawk a. Lunglei District chhung sik leh sa mil tur tak a ni.