2758/2026-2027

Lunglei, 2026 Khuangchawi Thla ni 21: Vawiin khan Nursing School Lunglei (NSL)-in 29th Batch Graduation leh 32nd Batch Lamp Lighting hun an buatsaih chu Lunglei Municipal Council (LMC) Chairman Pu Lalzuithanga chuan Khuallian nia hmanpuiin, Lunglei High Powered Committee (HPC) Vice Chairman Pu V. Malsawmtluanga chuan "V. Malsawmtluanga Award" semna hun a hmanpui bawk.

Nursing School Lunglei Auditorium-a zirlai chhuakte thlahna leh zirlai tharte lak luhnaah hian Khuallian Pu Lalzuithanga chuan nurse zir chhuakte leh zirlai tharte lawmpuina leh duhsakna a hlan a. Nurse-te chu mite tana inpekna nun leh, mi harsa, mangang leh ṭanpui ngaite chhanchhuak a, chhawmdawl a, tidam a, ṭanpui duhna nun kengtu an nih thu sawiin, khawngaihna ni ngawt lo va, hmangaihna nun chhuahpuitu, anmahnia damna leh nunna awm mi dangte hnena hlan chhawngtu an nih thu a sawi a. Nurse chu rawngbawlna pawimawh tak a nih avangin mahni leh in chhung khur hma lam ngawt thlira zir chi a nih loh thu leh tuina leh thiamna tak tak nena thawh chi a nih thu sawiin, hmangaihna tak tak nena thawk thei turin nuam ti tak leh taima taka zir turin zirlaite a chah a. Dik, thiam leh ṭangkai taka hna thawk thei turin tih tak taka zir a ṭul thu sawiin, zir thiamna chu inring tawk leh nuam ti taka hna thawh theihna tur leh mite tana ṭangkai leh malsawmna nih theihna tur a nih thu a sawi a. Nurse-te chezia leh ṭawngkam chuan mi a tidamin, a tina thei tih hre chunga mite tana damna, hlimna leh lungawina thlentu nih tuma zir tur leh thawk turin nurse zirlaite leh zir chhuakte chu a chah bawk.

Lunglei HPC Vice Chairman Pu V. Malsawmtluanga chuan NSL zirlai ṭha bikte tana ama sum senga a ruahmansak, "V. Malsawmtluanga Award" chu a ṭum khat nan a dawngtute kutah a hlan a. Amah hringtunu chu nurse a nih avangin nurse rawngbawlna hlutzia te, an inpekna leh thawh rimna te a taka hmuhpuitu leh hriatpuitu a nih thu sawiin, nurse rawngbawlna a ngaih hlutzia lantir nan leh zirlai chhuakte chu nurse ṭha tak ni tura fuih phurtu atan Award tur sum chu pe a nih thu a sawi a. Nurse zirlaite leh zir chhuakte chu mahni inchhi ral a, mi dangte tana malsawmna ni zel turin duhsakna a hlan.

NSL Graduation & Lamp Lighting Ceremony hi Warden Pi C. Lalrinpuii'n kaihruaiin, NSL Choir te'n hawnna hla an sa a. Civil Hospital Lungleia Senior Nursing Officer Pi Lalhuthangi'n hunserh hmangin, Nursing School Lunglei Principal Pi C. Rothangpuii chuan school report tlangpui a sawi a. Nursing School Lunglei hi kum 1995 December ni 17-a din a nih thu leh Indian Nursing Council (INC)-in phalna a pek angin kum thum zir turin kum tin zirlai 20 lak ṭhin an nih thu te, tun thlengin zirlai 500 chuangin an zir chhuah tawh thu leh an zirlai chhuakte pawh ram chhung leh ram pawn hmun hrang hrangah hna thawka an awm thu a sawi.

Christian Hospital Serkawn School of Nursing Principal Pi Vanlalthlengliani chuan nurse rawngbawlna pawimawhzia leh zirlaite fuihna thu sawiin, sathau khawnvar chhit chu Florence Nightingale-i leh nurse dang tam tak anga inpekna leh hmangaihna nena rawngbawl tura ke pen ṭanna a nih thu a sawi a. Khawnvar chu enkawlna, inpekna, beiseina leh finna entirna a nih thu sawiin, khawnvar chhi-a thu tiam tawhte chuan chu'ng nurse ze pawimawh takte chu an nunpui tlat a pawimawh thu a sawi a. Thliar bik nei lova damlote enkawl tur te, mahni hrehawm pawisa lova mite tana inpe tur te, damlote tana beiseina eng pe chhuak tur leh Pathian aṭanga chhuak finna nena mi dangte tana malsawmna nih tum tlat tur te'n zirlaite chu chahin, zirlai tharte leh zir chhuakte khawnvar chhit leh thutiam sawi rualna hun a kaihruai nghal bawk.

Mizoram Nursing Council (MNC) Examination 2026-a zirlai ti ṭha, Top 10-a langte chawimawina (proficiency award) hlan niin, Khuallian Pu Lalzuithanga'n zirlaite kutah chawimawina hi a hlan a. Civil Hospital Lungleia Nursing Superintendent Pi F. Lalthangkhumi'n nurse zir chhuak (graduate)-te certificate hlanin, fuihna thu a sawi a. Zir chhuakte leh sawm bikte aṭangin thu sawi ngaihthlak niin, Tutor Pi K. Lalawmpuii'n lawm thu sawiin hun a khar.

He'ngte hi zirlai chawimawina leh lawmman hrang hrang dawngtute an ni:

A. V. Malsawmtluanga Award:

(1) Special Award: C. Lalremruatpuii, Salem Veng, Lunglei (Graduate)

(2) 100% Attendance Award: Remsangpuii, Venglai, Lunglei (Graduate)

B. Proficiency Award:

1. 3rd Year (Final Year):

(1) Lalhruaitluangi, Zotlang, Lunglei – 3-na

(2) C. Lalremruatpuii, Salem Veng, Lunglei – 7-na

(3) T. Laldintluangi, Project Veng, Kolasib – 10-na

II. 2nd Year:

(1) Christine PC Lalrinsangi, Rahsiveng, Lunglei – 4-na

(2) H. Vanlalruati, Khatla South, Aizawl – 9-na

III. 1st Year:

(1) Lalrammawii, Rahsiveng, Lunglei – 4-na

(2) H. Lalramliani, Venghlun, Lunglei – 7-na

(3) Grace VL Chhanhimi, Mission Vengthlang, Aizawl – 10-na