1744/2024-2025

2024 Thlazing ni 26: Government J. Buana College, Lunglei chuan an college kum 40 tlin, Ruby Jubilee lawmna an buatsaih chu vawiin khan an college Multipurpose Hall-ah a kharna hun (closing ceremony) an hmang a, Lunglei West Bialtu MLA Pu T. Lalhlimpuia chuan Khuallian niin he hun hi a hmanpui.

Khuallian Pu T. Lalhlimpuia chuan Govt J. Buana College-a thawk tawh, thawk mek leh zirlaite chu Ruby Jubilee chibai bukin, PU a zir chhuahna leh kum 2004 - 2009 chhunga a lo thawh ve tawhna a nih avangin Govt J. Buana College chu a ngaihlu hle tih a sawi a. Kum 40 chhunga college hmasawnna kal chho zel chu Principal leh thawktu hmasate leh tunah thawk laite'n anmahni hun ṭheuhva an inpekna leh thawh rimna rah a ni tih sawiin, thawh hona ṭha tak hnuaia tun dinhmun hi thleng a ni tih hriat leh chhawm nun zel pawimawh a tih thu a sawi a. Mizoramah politics ṭha leh sawrkar inrelbawlna ṭha a awm theih nan mi tinin mahni phak tawka kan tih theih kan ngaihtuah a, tha kan thawh ṭheuh a pawimawh tih sawiin, khawtlang leh ram damna tura thil pawimawh tak pakhat chu 'zirna' nia a hriat thu a sawi a. Sawrkar pawhin Mizorama zirna tihhmasawn leh tihchangtlun nan hmathlir thui tak neiin, theih tawp a chhuah dawn tih sawiin, zirlaite chu thiamna leh eizawnnaa inelna sang tak hmachhawn ngam a, hlawhtling tura theih tawp chhuaha bei peih turin a fuih bawk a ni.

GJBC Ruby Jubilee kharna hun hi Assistant Professor-te - Pu Lalrinhluna leh Pi Lalhmingthangi Fanai te'n kaihruaiin, Associate Professor Pi Mary Lalromawii'n hunserh a hmang a. Principal Pu Lallianzuala bakah, Principal hmasa ber Pu C. Thanseia leh zirtirtu hluite'n thu an sawi a. Zirtirtu chatuan ram pan tawhte sunna hun hman niin, kum 40 chhunga college hmasawnna dan hlimthla, '40 Years of Progress' slideshow thlir ho a ni a. Jubilee Choir, Voices of GJBC, Jubilee Band leh mimal zai te ngaihthlak a ni bawk.

Govt J. Buana College hi kum 1983 khan din niin, kum 2007 October thla khan sawrkar college-ah hlan kai a ni a. Mizoram University hnuaiah inziak lutin, UGC hnuaiah 2f leh 12b category-ah a awm mek a. National Assessment and Accreditation Council (NAAC) hnuaiah B grade pek a ni bawk.

Govt J. Buana College hi under graduate co-ed arts college niin, English, Mizo, History, Geography, Economics, Education, Political Science, Public Administration leh Commerce-ah te core subject zir theih a ni a. Tun dinhmunah zirlai 377 an awm mek a ni.

College Ruby Jubilee hawnna (opening ceremony) hi nikum, 2023 August ni 26 khan college Multipurpose Hall-ah buatsaih a ni a. Ruby Jubilee lawmna hi kum 1 chhung kalpui niin, hemi chhung hian Ruby Jubilee Festival open air concert te, a thlawna thisen pek runpui (blood donation camp) te leh thing phun te kalpui a nih bakah, Lunglei khawpui chhunga zirna in hrang hrangah outreach programme te buatsaih a ni bawk.