1021/2026-2027

Lunglei, 2026 Nikir thla ni 16: Vawiin khan Lunglei District chhunga kawṭhalo (diarrhoea) vanga naupang thihna a thlen lohna tura, "Kawṭhalo ven nan faina leh ORS a pawimawh" tih thupui hmanga ni 45 (June 16 – July 31, 2026) chhung beihpui thlak, Stop Diarrhoea Campaign (SDC) kalpui tur chu Lunglei Chanmari Anganwadi Centre-II-ah Lunglei West bialtu MLA Pu T. Lalhlimpuia chuan a hawng.

Khuallian Pu T. Lalhlimpuia chuan naupangte hmakhua leh hriselna tura thil pawimawh tak mai, "STOP Diarrhoea Campaign 2026" kalpui a ni tur chu lawmawm a tih thu sawiin, Mizoram sawrkarin naupang hriselna a ngaih pawimawh thu leh naupang hrisel nana pawimawh tui thianghlim leh ei tur ṭha an hmuh theih nan theih tawpa hma a lak mek thu a sawi a. India ram pumah kumin thlenga naupang kum 5 hnuai lam sing nga (50,000) vel ngawtin kawṭhalo vanga nunna an la chan leh naupang thihna zawng zawngah kawṭhalovin 5.8% lai a la luah pha chu lungchhiatthlak a tih thu sawiin, hriselna chu ram dinhmun dik tak tar langtu a nih angin naupang hriselna atana theih tawp chhuah chhunzawm zel a ṭul thu a sawi.

Pu T. Lalhlimpuia chuan SDC kalpui chhungin Lunglei District chhunga naupang kum 5 hnuai lam target 10,868 hnenah kawṭhalo laka inven nan ORS packet 21,736 leh Zinc tablet 1,52,152 vel sem chhuah tum a nih thu sawiin, campaign hlawhtlin nan hriselna lama thawktu ASHA, Health Worker leh Anganwadi Worker te chu theih tawp chhuah tur leh nu leh pate pawhin ṭha taka lo thawhpui turin a chah a. Kawṭhalo vanga harsatna titlem turin sawrkar department hrang hrang, tlawmngai pawl leh mipui ṭan rual a pawimawh thu sawiin, mahni in leh a chhehvel vawn fai, thil ei hmaa kut sil fai ṭhat, kut sil dan dika kut sil leh tui thianghlim in tam bakah, kawṭhalo an awm a nih chuan ORS leh Zinc tablet pek vat ṭhin te a pawimawh thu a sawi.

He hun hi Lunglei District Senior Chief Medical Officer Dr Lalrinthangi'n kaihruaiin, SDC hman chhan a sawi fiah a. District Immunisation Officer (DIO) Dr Christina Zonunmawii chuan STOP Diarrhoea Campaign kalpui dan tur a sawi fiah a. Kawṭhalo chu naupang thihna thlentu tam ber pali zinga mi a nih thu sawiin, kawṭhalo chu ven theih a nih thu leh a venna hmanraw ṭha ber pakhat chu tui thianghlim in a nih thu te, kut sil fai ṭhat a pawimawh thu leh natna tam tak laka vengtu a nih thu te a sawi a. Rota Virus Vaccine (RVV) dose 3 lak hian nasa takin kawṭhalo vanga damlohna leh thihna a titlem tih sawiin, fate vaccine lak ngai pawimawh turin nu leh pate a chah a. Campaign chhunga naupang kum 5 hnuai lam kawṭhalo veite chu sub-centre emaw, ASHA te hnenah emaw report ṭhin turin nu leh pate a chah bawk.

Sub-Headquarters MHIP ai awh Pi Vanlalthangi Chhakchhuak chuan kut sil dan a taka entirin, naupangte a zirtir a. Naupangte hnenah kawṭhalo venna leh enkawlna tur ORS leh Zinc tablet sem niin, PHED Lunglei WATSAN Circle-a Superintending Engineer Er Lalsanga chuan lawm thu a sawi a. Hriselna leh tui thianghlim chu a inzawm tlat avangin PHED-in tui a sem tur chu uluk taka an thlit fim a, damdawi hmanga an tihthianghlim ṭhin thu sawiin, tun hnaiah Lunglei khawpui chhunga tuizem lian panga an enfiah thu leh a thianghlim ṭhat thu a sawi a. Sikul leh anganwadi centre ṭhenkhat tui dah khawl an endik (test)-ah hlauhawm tham ni lo mah se, bacteria an hmuh thu leh PHED tui sem chu thianghlim mah se, mahni tuizema bawlhhlawh lut thei laka fimkhur a ṭul thu te, a bikin sikul, anganwadi centre leh damdawi inte chuan an tuizema tuite chu a khat tawka PHED Laboratory Ramzotlanga endiktir leh a tihthianghlimna tur chlorine te dil ṭhin a ṭhat thu a sawi.

STOP Diarrhoea Campaign hi kawṭhalo vanga naupang kum 5 hnuai lam thihna a thlen lohna tura beihpui thlakna niin, kawṭhalo ven beihpui thlak chhung hian anganwadi centre, sikul leh damdawi in hrang hrangahte ORS & Zinc Corner siama damdawi (ORS & Zinc) sem hi kalpui a nih dawn bakah, kawṭhalo ven dan leh enkawl dan te, tui thianghlim in leh hman pawimawhna te, kut sil fai pawimawhna leh kut sil fai dan te, faina leh thianghlimna chungchanga naupangte leh anmahni enkawltute tana hriat tur pawimawh hrang hrang inzirtirna te buatsaih a ni ang.

Nikum 2025-a SDC kalpui chhung khan Lunglei health district (Lunglei District leh Hnahthial District inkawp) chhungah kawṭhalo ven/enkawl nan ORS leh Zinc tablet pek tur naupang kum 5 hnuai lam 13,684 tinzawn niin, mi 13,118 (95.9%) hnenah pek a ni a. Kumina SDC kalpui chhung hian Lunglei District bikah naupang kum 5 hnuai lam 10,868 tinzawn niin, ORS bawm (packet) 2 zel leh Zinc tablet mum 14 zel pek tura ruahman a ni.