1020/2026-2027 

Saitual, the 16th June, 2025: Vawiin khan Aganwadi Centre VII, Saitualah, India ram pum huapa naupangte zinga kawthalo (diarrhoea) vanga thihna pumpelhna tura beihpui thlakna “Stop Diarrhoea Campaign 2026” hawnna hun hman a ni a, Saitual Bawrhsap Pu Srinivas Sadi chu khuallian niin he campaign hi a hawng nghal a ni.

He hunah hian Dr. Zothanpari Chhakchhuak, Dy. CMO chuan ORS pawimawhna te tarlangin, mi tam tak kawthalo vanga an thih chhan chu taksaa tui leh electrolytes tlak chham (dehydration) vang a ni, a ti a, dehydration lan chhuah dan te a sawi bawk. Dy. CMO chuan naupang an kum a zira zinc pek dan tur te a tarlang a, kalkhawmte chu kut fai taka sil dan te a zirtir bawk a ni. 

Kumin STOP Diarrhoea Campaign thupui chu “ORS leh faina leh thianghlimna hmangin kawthalo lakah inveng rawh”- “Prevent Diarrhoea-Take care with Hygiene and ORS” tih a ni. June ni 16 atanga July ni 31, 2026  thleng kalpui tur niin, he campaign chhung hian naupang kum 5 hnuai lamte hnenah a thlawnin ORS leh Zinc tablet te sem a ni dawn a ni. ASHA leh healthworker te chu hmun hrang hrangah kalin kawthalo ven dan leh enkawl dan te, kut sil dan te, ORS leh zinc pawimawhna te, faina chungchang zirtirna te an pe ang. Sub centre-ah te leh Anganwadi Centre-ah te ORS-Zinc corner siam a ni ang a, heng hmunah te hian naupang kawthalote chuan enkawlna an dawng thei dawn a ni. 

Saitual District-a Stop Diarrhoea Campaign 2026 hawnna hun hi Dr. H Lalsangliana, MO Ayush chuan a kai hruai a, Dr. Zothanpari Chhakchhuak, Dy. CMO in thu a sawi bawk a ni. He hunah hian Aganwadi VII naupangte hnenah ORS leh Zinc sem niin, kut sil dan tur dik tak inzirtirna hun hman a ni bawk.