1019/2026-2027
Dated Aizawl: the 16 June 2026 : Vawiin khan Social Welfare, Women & Child Development Department changtu Minister Pi Lalrinpuii chuan Booth Mansion Conference Hall, Salvation Army Territorial Headquarter, Aizawl-ah, Beti Bachao Beti Padhao flagship hnuaiah Mizoram Postal Division leh Women & Child Development Department tangkawp hmalakna, hmeichhe naupang hmakhua ngaihtuahna, 'Project Thaichhawninu' chu khuallian niin a tlangzarh.

He hunah hian Pi Lalrinpuii, Social Welfare, Women & Child Development Department changtu Minister chuan thusawiin, Hmeichhe naupangte hamthatna leh Nu leh Pate mawhphurhna pawimawh tak tilang thei Project Thaichhawninu tlangzarh a ni ta chu lawmawm a tih thu a sawi a. Minister chuan, fanute chu ram leh hnam innghahna an ni tih sawiin, An hmakhua chu Mizoram hmakhua a nih avangin chumi ngaihtuah chu Nu leh Pate mawhphurhna pawimawh ber pakhat a ni a ti a. A fanu Mauruangi damkhawchhuah nana a nuin theitawp a chhuah angin,fa ten hmakhaw eng tak an neih theih nana kaihhruai leh venhim chu Nu leh Pa tinte ko va tla a ni tih a sawi a. Nu leh pa, pi leh pu bakah nau piang thar nei zawng zawng chu kum 10 la tling lo hmeichhe naupangte tan SSY account chu hawnsak theuh tura chahin, chumi kawngah chuan Kohhran, Tlawmngaipawl, Anganwadi Worker, ASHA, Zirtirtute leh Postal Department-a thawktute chu tanrualpuiah Minister chuan a sawm nghal bawk a ni.

Project hming ‘Thaichhawninu’ hi Mizo thawnthu hlun tak pakhat Mauruangi leh Bingtaitukite thawhnthu atanga lak a ni a. Mauruangi nu-in rethei tak chung pawha a fanu tan thaichhawn-a a inpek ang khan, tunlai nu leh pa ten Sukanya Samriddhi Account hmang hian an fanute hmakhua atan an inpek ve theih nan he project hi duan a ni.

project Thaichhawninu hi Mizoram District 11 chhunga RD Block 27, ICDS huam chhung khaw hrang hrangahte kalpui tura ruahman a ni a. Project hnuaiah hian hmeichhe naupangte chu Post Office leh State Bank of India kaltlangin account hawnsak theih an ni ang a. Anganwadi Worker leh Postal Department a thawktute chuan khaw tinah awareness leh account hawn runpui hi an nei dawn a. Ruahman ang chuan Thla 10 chhungin kum 10 hnuai lam hmeichhe naupang 4050 ziah luh hman tum a ni a. Tunah hian Mizoram-ah hmeichhe naupang 18,560-in SSY account hi an nei tawhin, kum 10 hnuai lam projected population nuai 1 leh sing 5 chuangatanga chhut chuan tan lak a la ngai hle a ni.

Vawiina Project tlangzarh inkhawm hi Pi Lalzarmawii, Commissioner&Secretary, SW, WC&D chuan a kaihruai a. KI Singh, Superintendent of Post, Mizoram Division-in Project Thaichhawninu chungchang a sawizau a. Pi Zoramthangi Chhangte, Director WCD chuan lawmthu sawiin tlangzarh inkhawm hi a titawp a ni.