Nizan dar 7:00 khan Zohnuai veng, Lunglei chuan an kum 100 tlin lawmna kharna hun an hmang a. Pu Joseph Lalhimpuia, Vice Chairman, HPC Lunglei chuan he hi khuallian niin a hmanpui a ni.
Vice chairman, HPC chuan Zohnuai veng chu thianghlim leh entawn tlak kum 100 chhunga hmingchhiatna nei lo a nih thu a sawi a. Mizoram ah khaw pakhat chhuak tia inlak hranna te pawh a reh tan thu sawiin mizo society pawh in hma a sawn mek zel a ni a ti.
Veng bil rilru dahtha a Mizo tawh phawt chu Mizoram pawn leh India ram pawn thleng pawha India leh Mizoram state ti hmingtha tur leh sum leh pai thawk chhuak tura ke kan pen zel a ngai a ni a ti. Non Residential Indian (NRI) te hi Indian sum leh paia ti hmasawn tu te zinga pawimawh tak an ni a. Mizo te pawh in NRI te tih theih ang hi kan ti thei ve in a rinawm a ni a ti.
Centenary kharna hun hi Zohnuai Centenary Committee puipa ten kaihruaiin, ‘Hlim zan’ Programme hlimawm tak hman a ni a. Zohnuai veng a lo piang Pu Joseph Lalhimpuia leh a unau te hian YMA, Sporting Club, MUP leh MHIP te hnenah Rs. 50,000, Chair 40 bakah Basketball, Football leh Volleyball, Team Jersey te an pe a ni.
