Vawiin chawhnu dar 2.00 khan Mahindra 2-Wheeler Mizoram Premier League (MPL) chu A.R. Ground-ah Sports Minister Pu Zodintluanga chuan a hawng a. MPL match hmasa berah Chanmari FC leh Luangmual FC te an inkhel a ni.
Sports Minister Pu Zodintluanga chuan, “MPL a hlawhtlin theihna tura Mizoram Football Association-te tanlakna hi fakawm a, sum leh pai senso inhuama football hmasawnna tura ZONET Cable TV-te inphalna leh thahnemngaihna hi a ropui a ni” a ti. Football hmasawnna tura MFA-in Holland ramah pawh Coach hial ni thei leh AIFF Technical Director ni bawk Rob Baan an chah thleng thei chuan an inpekna thukzia a lantir thu Sports Minister chuan a sawi lang bawk. Pu Zodintluanga chuan khelmual tha awta thalaite an au rual thin thawm chu hriain sawrkarin khelmual tha tak tak a chhawpchhuahsak thu sawiin, “Tunah chuan khelmual tha kan hlui tawh che u a, a hlawhtlinna chu in kutah a awm ve tawh a ni. Chuvangin, in thisen, in thlantui leh in mittui tla khawpa hiala hlawhtlinna sualchhuak turin sawrkar chuan kan thalaite hi kan cho let che u a ni” tiin infiammite a fuih.
Khualzahawm Rob Baan pawhin thu sawiin, “Kum khat liam ta chhunga in hmasawnna hian nasa takin min tiphur a, football khelmual pathum ngawt mai grass phah in nei tawh a. Mizoram football hmasawnna hian nakinah chuan FIFA ranking-a India ram dinhmun pawh a la chawisan ngei ka beisei a ni” a ti.
ZONET Cable TV Pvt. Ltd. Managing Director Pu R.K. Lianzuala pawhin MPL sum senso an tumsak chhan a sawifiah a. “Sumdawnna rilru atanga ngaihtuah chuan kan sum senso hi thil atthlak tak a ni mai thei a; nimahsela, keini chuan kan hlawkna hi a pawisaa chhut kan tum lova. India ram football club hrang hrangah te, national leh international level-ah te Mizo tam zawk kan tel belh chuan chu chu hlawknaah kan ngai a. Chutiang tur chuan kan thawhpui MFA te hi kan ring tawk a, kan player-teah hian beiseina kan nei bawk a ni” a ti.
MFA Honorary Secretary Pu Lalnghinglova Hmar pawhin inlawmna thu sawiin, “Mizoram-a football hlawhtlinna tak tak chu a entu mipuiteah a innghat thui hle a; chuvang chuan kan thalaite inkhel en hi mipuiten kan uar lehzual a tul a ni” a ti.
