No.260/2021-2022

Lunglei the 25^th April, 2021 - Vawiin chawhnu dar 1:00 khan Lunglei District Disaster Management Authority (DDMA) chu an Chairman Lunglei DC Pu Kulothungan A kaihhruaiin a office chamber-ah Lunglei khawpuia kangmei nasa tak chhuak mek chungchang ngaihtuahin Emergency meeting an nei a ni. Meeting-ah hian District Disaster Management Authority (DDMA) member-te bakah Sub Hqrs YMA Lunglei hruaitute an tel a ni. 

Nimin zing atanga Lunglei veng engemawzat ram kangin hlauhthawnawma a tihbuai chu nimin tlai lamah a ziaawm hnuin nizan atang khan kang tha lehin kang thelh hna vawiin nileng khan thawh leh a ni a. Khua a ro tawh avangin kangmei chhuak hi thelh mih a har hle a, tlawmngaite leh kang thelhtu ten theihtawp an chhuah a, a kanna hi veng hrang hrang zawn a nih avangin a zau hle a, a thelh hna hi a hautak em em a ni. 

Vawiin DDMA Emergency meeting-ah hian a kaihhnawih Department te hmalak dan tlangpui report ngaihthlak niin kangmei thelh mih thuai anih theihna tura hmalak tul te sawihovin ruahmanna siam a ni a. Kangmei hi tun dinhmunah tih mih mai a la beiseiawm lo nia a lan avangin Lunglei Fire Station thawktute puibawm turin Fire & Emergency Services, Aizawl atangin kangthelh motor pahnih leh thawktu mi pasarih (SO pakhat, fireman panga leh driver pakhat) lo phei tura tih niin Lunglei pana anlo kal mek thu report a ni a. Tui chawi turin 2^nd Battalion MAP tanker chu hman belh ni se tih an rel bawk a. Kangmei thelh tur hian Indian Air Force ngen ni se tih committee chuan relin hei hi Mizoram sawrkar hotute hnena thlen nghal turin an rel a ni. 

Kangmei thelh hna thawk tura veng hrang hranga mi tlawmngai leh inpe rawn pen chhuak te chungah Lunglei District Disaster Management Authority (DDMA) chuan lawmthu a sawi a. Private tui phurtuten phal taka an motor a thlawna an hman tir avangin DDMA chuan an chungah lawmthu a sawi bawk a ni.

Disaster Management kaihhnawiha Lunglei District chhunga Executive Magistrate/Incident Commander pasarih (7) te chuan vawiin chawhnu hian an bial an fang chhuak dawn a, ruahmanna siam tul leh Veng in an mamawh te an enfiah dawn a ni. Lunglei District Incident commanter-te chu a hnuaia tarlan te hi niin Veng/khua harsatna nei te chuan mahni bialtu Incident Commander hnenah thlen vat tur a ni: