No.264/2021-2022
Lunglei the 25th April, 2021 - Zanin dar 6:00 khan Lunglei DC Pu Kulothungan A kaihhruaiin DC Conference Hall- ah Lunglei khawpuia kangmei nasa tak chhuak mek chungchang ngaihtuahin Emergency meeting neih a ni. Meeting-ah hian Executive Magistrate-te leh a kaihhnawih sawrkar official dangte, 199 Bn BSF, 131 Bn BSF, 3rd Assam Rifles, VC-te leh Sub Hqrs YMA hruaitute an tel.
Meeting-ah hian mawhphurna hrang hrang te insem niin chetlak zel dan tur sawiho a ni a. Executive Magistrate-te chu anmahni bial theuhah kang kai mai thei dinhmuna ding mek veng/khua te tan a tul anga insenghawi theih dan tur ‘Evacuation Plan’ mumal tak ruahman tura tih an ni a. Veng/khua YMA leh VC-te nen inrawnin ruahmanna an siam dawn a ni. Kangmei avang hian medical emergency pawh thleng thei a nih avangin H&FW Department chu Emergency plan lo nei tur leh Ambulance te pawh lo ruahman lawk tura tih an ni. Kangmei chhuah nasatna leh kang kai mai thei dinhmuna ding khua/vengah te private tui chawi motor-te chu zan khuaa lo ding lawk tura ngen ni se tih rel a ni bawk a. 199 Bn BSF, 131 Bn BSF, 3rd Assam Rifles te pawh a tul angin an che chhunzawm ang.
Executive Magistrate/Incident Commander ten an bial fang kualin darkar tin Hourly Report DC hnenah zanin zan khuain an thehlut anga. Naktuk zing dar 4 ah Lunglei DC Pu Kulothungan A, SP Pu Rex Zarzoliana Vanchhawng, PD DRDA Pu K.Lalrohlua leh Addl DC Pu M Misael ten Lunglei khaw pum inspection an nei dawn bawk a ni.
Lunglei Fire Station thawktute puibawm tura Fire & Emergency Services, Aizawl atanga kangthelh motor pahnih leh thawktu mi pasarih (SO pakhat, fireman panga leh driver pakhat) rawn tirh phei te pawhin zanin dar 7 vel khan Lunglei an lo thleng a ni.
He kangmei thelh tura Mizoram sawrkarin Indian Air Force (IAF) hnenah tanpui a zuk ngen tawh angin, IAF chuan Mi-17V5 helicopter pahnih an deploy tawh a. Principal Consultant, Aviation Wing, GAD Wing Commander J.Lalhmingliana’n zanin 7:30 ah a report danin helicopter lian pahnih te hian Bagdogra atangin Guwahati Airport an thleng tawh a, zan an riak ang. Naktuk zing dar 5:00 ah Scout Helicopter (lo enfiah hmasa tur) Guwahati atanga rawn chhuakin Kawmzawl Helipad zing dar 6:00 ah a tum ang a. Lunglei atanga GPS Co-Ordinates thehluh tawh enin Tlabung Khawthlangtuipui a tui awmna tur leh Tuipui D hmun hma an en ang. Hmalakna a kal tluan chuan, Guwahati ah let lehin Helicopter lian chi MI-17V5 te hi kang thelh hna thawk turin an rawn thlawk chho nghal ang a. Aviation Turbine Fuel chu Lengpui Airport ah refilling tih zel tur a ni ang.
Hetih lai hian EF&CC etc changtu Minister Pu TJ Lalnuntluanga, Dr.Vanlaltanpuia, MLA & Chairman MYC leh Pu Lalrinsanga Ralte, MLA & Vice Chairman Rubber & Allied Crops Development Board te chu Lunglei panin zanin tlai dar 5 khan Aizawl an rawn chhuahsan a ni.
Nimin zing atanga Lunglei veng engemawzata ram kang chu nimin tlai lamah a ziaawm a. Amaherawhchu, nizan atang khan kang tha lehin kang thelh hna vawiin nileng khan thawh chhunzawm a ni a. Khua a ro tawh avangin kangmei chhuak hi thelh mih a har hle a, mi tlawmngaite leh kang thelhtu ten theihtawp an chhuah a, veng hrang hrang engemawzat hnaih tak takah kangmei hi darhzau taka a chhuah avangin a thelh hna hi a hautak em em a ni.
Attachment
- Loading attachment...
