Vawiin chawhma dar 10:30 khan Pu Joseph Lalhimpuia, Parliamentary Secretary, Commerce & Industries Department  chuan Lunglei  Chanmari Venga Knitting & Tailoring Centre cum Finance Department House tur a hmunah a en. Parliamentary Secretary hi Finance Department Secretary Pu Lalmalsawma leh Commissioner, Commerce & Industries Department Pu Zothankhuma leh sawrkar mi pawimawh dang ten an tawiawm a ni.

Pu Joseph Lalhimpuia chuan puanthui zirlai naupang te hnenah thu sawiin kum reilo te chhunga hmasawnna tam tak an neih chu an taimakna rah a ni tiin, a lawmpui thu a sawi a. Khaw hrang hrang atanga puanthui zir tura kalkhawmte hnenah Parliamentary Secretary chuan fuihna thu sawiin, “Kum khat chhung puanthui zirin hun in hmanga, hlawhtling leh sum thawk chhuak thei tura in thiam chhuak anih loh chuan kum khat hun in paih dawn tihna a ni a. Thiam taka in zir chhuah erawh chuan nakin zela in chhungkaw dinchhuah na  tur a ni dawn a ni ” a ti. Finance Department hotu lian ten a hmun an rawn enpui chu lawmawm a tih thu sawiin, trainees te chu tun sawrkar kum chhung ngeia building thara an awm hman a beisei thu a hrilh.

A hmuna entu Pu Lalmalsawma , Secretary, Finance Department chuan a hmunhma chu  tha a tih thu sawiin, State plan atanga sum dah tur anih avangin Finance Department lamin Mizoram sawrkar department hrang hrang te sum mamawh an sem darh hunah an lo enchian tur thu a sawi.

Puanthui zirna hmun hi kum 1986 atanga din tan niin tun dinhmunah a building pawh a hlui tawh hle a. Sawrkar chuan thalaite tana eizawnna kawng ngaipawimawhin changtlung zawka he Training Centre hi siam chhoh tumin hma a la mek a ni. Commerce & Industries Department lamin DPR an siam dan chuan Rs 198 Lakhs man tura ruahman niin, chhawng li-a sak tur a ni a, Finance Department-in floor khat hi office leh tul danga an luah tura ruahmanna siam a ni.