Vawiin chawhnu khan Mizoram chhunga kutthemthiam thil hrang hrang thawka eizawngtute intelkhawmna pawl, Mizoram Mistiri Association (MMA) chuan Chanmari YMA Hall-ah an pawl din champha vawi 10-na lawmin Chief Minister Pu Lal Thanhawla hovin hun an hmang.

Chief Minister Pu Lal Thanhawla chuan mistiri hna chu Mizoram mai nilo khawvel hmun hrang hrangah mitin ten an mamawh em em leh  hna pawimawh tak  a ni, a ti a.  MMA ten pawl anga kum 10 hunchhung an hmang thei chu a lawmawm a tih thu sawiin hmasawn zel tuma hmalam pan zel turin a chah. " Pathian in Mizote hi min siam danglam bik a. Midang ten harsa taka an zir thin te hi hun reilote chhungin kan thiam nghal zung zung a. Ulukna erawh kan nei tlem deuhva; kan inbih chian chuan midang aia hlawhtlin theihna kan nei tam bik a. Mistiri hna-ah phei chuan kutchhuak thar rang aiin hnatha, thilsiam tlo, thilsiam mawihnai leh a hmawrbawkna uluk a pawimawh zia te kan inhrilh tawn mawlh mawlh a ngai a ni", a ti a.

Hnathawhna hmun himlo lai a eizawngtute an nih avanga mistiri te tan insurance pawimawhna sawrkarin a hria a, zirchianna nei mekin Labour, Employment & Industrial Training Department pawh hemi kawngah hian chak taka hma la tura tih an ni tawh a ni a ti a. Mistiri leh kuthnathawktu dangte hamthatna turin Mizoram Building & Other Contructions Workers' Welfare  Board pawhin tha thar a thawh mek zel thu a sawi a.  Tanpuina dawng thei tur chuan taihmak, tih takna rilru leh tumruhna atanga tanpui theitute  hriat hlawh nih te pawh a pawimawh tel a ni a ti.  

Ram hmasawn na turin a chhunga chengte - hna hrang hrang thawktu te, nihna hrang hrang chelh tu te, sawrkar hnathawk leh kuthnathawktu te chuan mawhphurhna an inpeizawn vek tih a sawi a.  Kuttlinglova sum lakluh duhtute avanga hmasawnna ruhrel - kawngpui, tuikhuah, rel kawng leh thildang siam hna te thawh chhunzawm hleih theih lova awm thin chu a pawi takzet a ni a ti a. Chief Minister chuan ram in hruaitu tha a mamawh rualin hruaitu tha ten hna an thawh theihna tura mipui mawhphurhna te a sawifiah a. Ram hruaitu tha leh mipui thil tha duh ten  ram hmasawnna nasa zawk an siam thei a ni a ti.

"Tunhma in kan ramah kan thawhtheih thawhna chang kan hriat loh avangin kan sum tham tam tak kan ram a chambang thei tur  te chu state pawnlam min ten rut fai vekin an hawn thla tawk tawk a. Tunah erawh,  sawrkar hmalakna leh YMA thahnem ngaihna zarah te kan thalai ten pawnlammi thiamthil te thiam ve tan tawh in pawnlam mi sum hawn thlak thin tam tak chu an chhuh tawh a; a lawmawm hle a ni. Tanlak nasat erawh kan la ngai hle" a ti a. Mizo thalaite  chaklohna leh hnathawh theihlohna chhan chu zuk leh hmuama insum theihloh luat avanga hrisel lohna hrang hrang a nih thu a sawi a. Hrisel loh chuan a taihmak theih lova hna pawh a thawh theih hek loh. Chuvangin ruihlo, zuk leh hmuam bakah nun in ulukna chu hnam anga Mizo te tanlakna  tur a ni a ti.

MMA kum 10 tlin lawmna programme hi Pu Vanlalhriata, Vice President, MMA in a kaihruai a. MMA General Secretary  Pu CD Lalthlamuana'n report a pe a ni. Tun dinhmunah MMA ah hian member 1700 awm mekin Mizoram dung leh vangah Branch 50 din a ni tawh a. He pawl hian vantlang tan pawh an theih ang tawkin vawi tam tak, Genral Headquarters hming leh an branch thenkhatte pualin  an fehchhuak tawh a. TNT, TBCC, Civil Hospital, Referal Hospital, Falkawn, Cancer hospital, together in Christ, Melthum leh hmun hrang hrangah te an lo hnatlang tawh a ni.