2687/2025-2026

Lunglei, 2025 Pawltlak thla ni 16: India-Pakistan War 1971-a India-in hnehna a chan hriat reng nana kum tin December ni 16-a hman ṭhin, "Vijay Diwas" pualin tukin khan Lungleia War Memorial-ah hun hman a ni.

Vijay Diwas lawmna hi Lunglei District Sainik Office huaihawta hman niin, 20 Assam Rifles, 2 Mizo Battalion National Cadet Corps (NCC) leh Mizoram Ex-Services League (MESL) Lunglei aṭangin sipai, cadet leh sipai bang eng emaw zat an tel a. Ram tana nun hlantu sipai huaisen martarte leh ram tana huaisen taka beitu sipaite hriat reng nan leh anmahni zahna lantir nan sipai inchawimawi dan famkim nen urhsun taka hun hman a ni.

Lunglei District Sainik Welfare & Resettlement Officer Maj. Rebecca L. Chhakchhuak (Retd) chuan hawnna thu sawiin, 2 Mizo Bn NCC aṭangin Vijay Diwas chanchin tlangpui ngaihthlak a ni a. Hnam Hla (National Anthem) sak niin, 2 Mizo Bn NCC Commanding Officer Col. Sagar K. Mohanty, ECHS Officer-in-Charge Col. Arun Sharma (Retd), 20 Assam Rifles Commanding Officer Col. Jaswinder, District Sainik Welfare & Resettlement Officer Maj. Rebecca L. Chhakchhuak (Retd), MESL Lunglei President, sipai hotu leh ex-servicemen eng emaw zatin War Memorial-ah hian martarte zahna lantir nan pangpar an dah bawk.

Pakistan awpna aṭanga East Pakistan (Bangladesh) chhuah zalenna tur leh Bangladesh ram a lo pian theihna tura kum 1971-a India leh Pakistan indonaa India-in hnehna chhuanawm tak a chan hriat reng nan Vijay Diwas hi kum tin December ni 16-ah hman ṭhin a ni a. He indonaa rang taka Pakistan sipaite tuk zal a, Dhaka khawpuia Pakistan sipai 93,000 lai India kuta an inpek theihna tura India sipaite huaisenna leh ram tana an inhlanna hriat reng nan he ni hi hman ṭhin a ni.

India-Pakistan War (Bangladesh Liberation War) 1971-ah hian Mizoram aṭangin sipai huaisen tak tak 320 vel chuan India sipai regiment leh corp hrang hrang hnuaiah huaisen takin ral an do ve a. An zing aṭang hian indonaa martar 11 leh hliam tuar 24 vel an awm nia chhinchhiah a ni.

War Memorial Lunglei hi kum 2000 khan din niin, Lunglei khawpui laili, Chanmari veng chhunga awm a ni a. Indopui Pahnihnaa ram tana nun hlantu sipai martar mi 103 te leh hel beihnaa martar mi 5 te hming chuanna leh anmahni hriat rengna lungphun pahnih awmin, Lunglei DSW&RO office-in an enkawl a ni.