277/2026-2027 

Lunglei, 2026 Ṭau thla ni 24 : Lunglei khawpui laili taka awm, indonaa sipai martarte hriat rengna lungphun, War Memorial chei ṭhat thar chu vawiin khan Assam Regiment 3 Corps General Officer Commanding (GOC) Lt Gen. Abhijit S. Pendharkar, UYSM, AVSM, YSM chuan ralkhat aṭangin biakhmuhtheihna (video conferencing) kal tlangin a hawng.

War Memorial hawnnaah hian 3 Corps GOC ai awhin 23 Sector Assam Rifles Commander, Deputy Inspector General Brig. Puspendar Sorayan chuan a hmunah War Memorial khuhna puanzar pawt hawngin, Corps Commander ai awhin ram tana nun hlantu sipai huaisen martarte zahna leh hriat rengna pangpar kual a dah nghal a. War Memorial Lungleia hming chuang sipai huaisen martarte hriat reng nan leh anmahni zahna lantir nan hian Lunglei Municipal Council (LMC) Chairman Pu Lalzuithanga, District Sainik Welfare & Resettlement Officer Maj. Rebecca L. Chhakchhuak (Retd), Mizoram Ex-Services League (MESL) hruaitute leh martar chhungte'n pangpar an dah bawk.

Sipai martarte puala pangpar dah a nih hnu hian anmahni hriat reng nan leh sun nan minit hnih chhung ngawi renga din a ni a. Sipai tih dana tawtawrawt ham leh silai nena chibai bukna hun hman a ni bawk.

Assam Regiment 3 Corps Commander Lt Gen. Abhijit S. Pendharkar chuan Lungleia War Memorial chu ram tana nun hlantu sipai huaisente chawimawina leh an inpekna hriat rengna atana din a nih thu sawiin, mi ṭhahnem ngaite inpekna avanga chei ṭhat a nih hnua hawn theih a ni leh ta chu lawmawm a tih thu a sawi a. War Memorial-a hming chuang martarte chu khua leh tuite himna leh ralmuanna atana nun hlantu; sipai ni satliah ngawt lo va, thawnthu tam tak hnutchhiahtu; Mizo tlawmngaihna laimu—mi dangte tana inpekna—a taka nun chhuahpuitu an nih thu sawiin, an inpekna chu zah taka hriat reng a nih tur thu a sawi a. Martar chhungte chu an hmangaih kal tate inpekna chu a thlawn lo tih hria a, anmahni hriat rengna chhuang taka vawng nung zel tura chahin, an sulhnu chu suanglungah ni lovin, thinlungah a inker tih hre reng turin a chah a. Sipai ṭang laite pawh martarte inpekna chu hun liam tawha mi anga ngai lo va, ram tana an tih theih sang ber hriat thartirtua hmang tura chahin, hriat rengna lungphun chu ram mipuite'n ram tana inpekna hlutzia hriat tharna atan te, hriat rengna chauh chuan amahin remna a vawng thei lo va, inpumkhatna leh inpekna nen mipuite'n remna leh muanna chu vawn him tur a ni tih hriat thartirtu atan te hmang se a duh thu a sawi.

23 Sector Assam Rifles Commander Brig. Puspendar Sorayan chuan ram tana nun hlantu sipaite leh ram tana theih tawp chhuaha thawktu sipaite chuan ngaihhlut leh chawimawi an phu hle tih sawiin, sipaite chu ram mipuite tana thawk an nih thu a sawi a. Assam Rifles chuan Mizoram mipuite nen thawh hona ṭha tak an vawng tih sawiin, ramri ven himna bakah, mipuite'n khawtlang nun leh ei leh bara hma an sawnna turin kawng hrang hranga hma an lak thu te, hriselna, zirna leh inzirtirna kawngah a ṭul anga ṭanpuina leh kaihhruaina an pek ṭhin thu te, ṭhalaite ruihhlo laka an him theih nan ruihhlo tawlh ruk ven kawngah nasa taka hma an lak thu leh ruihhlo ṭhahnem tak an man ṭhin thu te a sawi a. Mizoram hmasawnna kawng hrang hrangah a theihna apiangah sawrkar leh mipuite thawhpui an inhuam thu a sawi.

LMC Vice Chairman Pu K. Lalrinawma chuan Lunglei khaw chhunga War Memorial awm chu Lunglei mipuite leh LMC-in an ngaih hlut thu leh LMC sawrkar a din hnuah a chei ṭhat dan tur te pawh ngaihtuah ṭhin a nih thu sawiin, chei ṭhat a nih theih nana Lunglei DSW&RO leh thawktute ṭhahnem ngaihna fakawm a tih thu leh 3 Corps Assam Rifles GOC ruahmannaa chei ṭhat a ni ta chu lawmawm a tih thu a sawi a. War Memorial chu martarte zahna leh hriat rengna vawng nungtu leh Lunglei khawpui chei mawi a, tiropuitu a nih zel a beisei thu a sawi.

Lunglei DSW&RO Maj. Rebecca L. Chhakchhuak chuan War Memorial hmun chu Mizoram sawrkarin kum 1977-a a pek a nih thu leh Indopui Pahnihnaa 1st Assam Regiment sipai martar mi 103 te hming leh Independence hnua Lunglei District aṭanga Assam Regiment sipai martar mi 5 te hming chuanna lungphun pahnih a awm ṭhin thu sawiin, tunah 3 Corps Commander hma laknaa chei ṭhat niin, lungphun pakhata dah a nih thu a sawi a. War Memorial chei ṭhatna kawnga tha thawhtu zawng zawng chungah leh martar chhungte chungah te, War Memorial hawnnaa telte chungah te lawm thu sawiin, chu hmun chhuanawm leh ropui tak chu humhalh a, chawi vul zel turin Lunglei mipuite a chah.

War Memorial Lunglei hi Lunglei khawpui laili, Chanmari veng chhunga awm a ni a. Indopui Pahnihnaa ram tana nun hlantu sipai martar mi 103 te leh hel beihnaa martar mi 5 te hming chuanna leh anmahni hriat rengna lungphun awmin, Lunglei DSW&RO office-in an enkawl a ni.