Vawiin khan Lunglei DC Conference Hall-ah “Electoral Literacy for Stronger Democracy” tih thupui hmangin 10^th National Voters Day pualin hman a ni a. He hunah hian Lunglei District Election Officer leh DC ni bawk Pu V. Lalsangliana, IAS chu khuallian a ni.

10^th National Voters Day hmanna inkhawm Pu J. Miahlung, Election Officer kaihhruaiah Pu V. Lalsangliana chuan thu sawiin January ni 25 hi Election Commission of India din ni niin, hemi ni pual hian 25^th January, 2011 khan a vawikhatna atan National Voter Day hi India ram pumah hman anih thu a tarlang a. India khua leh tui vote nei thei chin kan nih chuan vote thlak hi kan dikna chanvo leh kan mawhphurhna pawimawh tak a ni tiin vote thlak pawimawhna leh kum tling tharte electoral roll-a an hming thun luh pawimawhna chungchangah nasa lehzuala inhrilh hriatna (awareness campaign) kan kalpui zel a tul takzet a ni, a ti a. Vote thlak chu kan ram rorelna sang berah thu kan va sawi ve theihna hun hlu tak a ni tiin MLA leh MP election mai bakah kan khawtlang hruaitu VC election te pawh ngai pawihawha mipui tam zawkin vote kan thlak a tul a ni, a ti a. Election kaihhnawih hmalakna hrang hrang a bik takin electoral roll dik leh felfai kan neih theihna tura hmalakna ah te BLO, NGO-te leh khawtlang hruaitute thahnemngaihna a fakawm takzet a ni tiin Lunglei DC hian thawhho pui zelah a sawm bawk. 

He hunah hian 10^th National Voters Day pualin thutiam sawihona hun hman a ni a. Lunglei Dy District Election Officer leh Addl DC ni bawk Pu R. Vanrengpuia’n a kaihruai a ni. He thutiam hi sawiho a ni:

“Keini India khua leh tuite, mipui sawrkara rinna nghat tlat te chuan mipui rorelna kalphung dik chawi nung zel tur leh inthlanna felfai leh muanawm neih a nih theih nan inthlanna apiangah khua leh tui kan nih anga kan tihtur min dal thei chi reng reng sakhua emaw, chi leh kuang emaw, tawng hrang emaw avanga tihluihna leh thlemna engpawh hnawl a, huaisen taka vote turin ka intiam e.”

Tin, 10^th National Voters Day pual hian Lunglei District chhunga BLO ti thate chawimawina ‘Best BLO Award’ sem chhuah a ni bawk a. Thuziak leh pawisa fai cheng 3000 theuh an dawng a ni.

BLO ti tha thlanchhuahte chu:

30 - Lunglei North            -           Pu R.Lalbiakthanga, Sekhum, BLO

31 - Lunglei East                -            Pu Zohmingliana, Electric-III, BLO

32 - Lunglei West              -            Pu Hmingthanhlua, Bazar-III, BLO

33 - Lunglei South            -             Pu K.Lalrinchhunga, Tawipui N-I, BLO