Health & Family Welfare Minister Dr. R.Lalthangliana  ngenna chhangin Mizorama private leh kohhran damdawi in inzawmkhawm pawl Non-Governmental Hospital Association of Mizoram (NGHAM) chuan Mizoram State Health Care Scheme zawm an rem ti.

Health & Family Welfare Minister chuan NGHAM ten a ngenna siam ngaipawimawh a, mirethei zawkte leh chanhai zawkte hmangaihna rilru pu chunga Mizoram State Health Care Scheme zawm an remti chu thinlung takin lawmthu a hrilh a, a bul tan chauh an la nih avangin sawiselbo leh felfai vek a nih a rin bik loh thu leh a nihna anga hman phawt a, siam that ngaite pawh siam that zel a nih tur thu a sawi a. NGHAM ten Healthcare Scheme chungchanga an ngaihpawimawh zawngte pawh a hriat thu leh an harsatna te sutkian leh chinfel zel a inhuam thu a sawi a ni.

NGHAM hotute chuan Minister ngenna hi vawiin a NGHAM General meeting ah an ngaihtuah nghal thu leh Minister meuhin a sawmna chu zahawm an tih thu Minister an chhanna lehkha ah ziakin an member Hospital 18 te Government recognition suspend an nihna hlih sak turin an ngen nghal a, hei hi Health Minister chuan bawhzui nghalin official pawimawhte a kova, a rang thei ang bera hma la turin a hrilh nghal a ni.