Vawiin hi  National Girl Child Day a ni a, he ni pual hian India rampumah a lawmna hun hman a ni a. Mizoramah pawh State Resource Centre for Women, Women & Child Development Department hmalakna-in he ni pawimawh tak Social Welfare Minister Pu Dr. K.Beichhua  hovin a ma chenna in kawtah  hman a ni.

Dr.Beichhua, Social Welfare Minister chuan National Girl Child Day hi kum tin  24th January-ah hmeichhe naupangte dinhmun enfiahna atana hman thin a ni  a ti a.  "He ni hi ram puma hmeichhe naupangte’n rahbi thar an rah theina tur te, himdam tak, ralmuang leh thlamuang zawka khawvel an hman chhoh zel theihna atan tan kan lakna tura ruahman a ni", a ti a. Hmeichhiate’n khawtlang leh ram chhungah inthluktlanna an neih theihna tura mipuite hrilhhriatna hun atan hman thin a a ni a ti. 

 “ Vawiina kan ram dinhmun ngaihtuah hian hmeichhiate dinhmun a pawimwh hle tawh a, chuvangin harsatna an tawh thin hrang hrangte sut kian pui turin theihpatawp kan chhuahpui hi Mizoram mipuite’n kan tihtur a ni a. Tin, he ni hian Hmeichhe naupang chauh nilovin, nula leh nu - hnutepelaite hamthatna tur thlengin hi a kawk tel bawk a, Naupang than thu awmlova hrisel taka an than chhoh theihna tur a hmalak te, thliar hranna awm lova zirna tha tak an dawn theihna tura hmalak pui pawh a keng tel a ni. Kan fanute chauh nilo, hmeichhe naupang tupawh kan en hrang lova, kan Zoram-ah hian boruak tha, him tak leh ralmuang taka hun hmang chho zel turin Hmeichhia tupawh – naupang leh puitling zawng zawng duhsakna ka hlan e”, a ti. 

National Girl Child Day lawmna programme hi  Pi Vanlalpianpuii, Director, Department of Women & Child Development-in a kaihruai a. Prime Minister Narendra Modi-an National Girl Child Day denchhena  a lo hawn tawh  Beti Bachao Beti Padhao (BBBP) Scheme, Ministry of Women & Child Development kalpui mek chungchang sawifiah a ni a. He Scheme in a tum ber chu hmeichhe naupangte dikna chanvo humhalh sak a, dam leh him taka an chenna khawvel buatsaih sakte leh enhranna tellova an lo thanlen zelna tura kawng kawhhmuha hma lak puite a ni.  He Scheme kaltlang hian kum tinin BBBP Week chu hman thin a ni a. Kumin atan hian Mizoram-ah pawh ni 20th– 26th January thleng hman tura ruahman ni a. Tin, he week hi BBBP Scheme atana District thlan bik Serchhip leh Siaha-ah hman niin, National Girl Child Day bik erawh District tinah Deputy Commissioner hmalakin hman a ni bawk. 

National Girl Child Day pual hian “Supporting Green Environment and the Birth of Girl Child for a better tomorrow” tih thupui hmangin thingphunna hun hman chhunzawm nghal a ni a. Social Welfare Minister bakah Senior Official te’n thing an phun bawk a ni.Tin, he ni hriatrengna atan Civil Hospital, Aizawl-ah vawiin-a naupiang hmeichhia-te hnenah lawmpuina certificate leh pawisa fai hlan an ni bawk.