2010/2024-2025

2024 Mimkut thla ni 11: Vawiin September ni 11, 2024 hi Mizorama vaihlo leh a kaihhnawih dona ni, Mizoram State Anti-Tobacco Day (MSATD) vawi 11-na niin, he ni pual hian tukin khan Mizoram Sawrkara Health & Family Welfare Minister Pi Lalrinpuii hovin hriselna lama thawktute leh Southern Flower School Lungleia zirlaite'n vaihlo leh a kaihhnawih ṭhat lohzia tlangaupuiin Lungleiah kawng an zawh.

Kawng zawh hmaa Civil Hospital Lunglei tuala inkhawm tawi buatsaihah Health Minister Pi Lalrinpuii chuan zuk leh hmuam ṭhat lohzia mite hnena hriattir tura kawng zawhtute leh thuziak kenga zirtirna tlangaupuitute ber zuk leh hmuam laka fihlim leh si loh chu a dik dawn lo tih sawiin, kawng zawh turte chu zuk leh hmuam laka inthiar fihlim tur leh a ti mek an nih pawha sim tum turin a chah a. Kawng zawh huaihawt chuan vaihlo leh a kaihhnawih ṭhat lohzia mipuite a zirtir a, an thinlunga zuk leh hmuam duh lohna a tuh ngei a beisei thu sawiin, kawng zawha chhuak turte chu a vai liam nghal a ni.

He hun hi National Tobacco Control Programme (NTCP) State Nodal Officer Dr H. Lianthangpuia'n kaihruaiin, zuk leh hmuam ṭhat lohzia tlangaupuina leh a laka inthiar fihlim tura mipuite zirtirna atana kawng zawh chu huaihawt a nih thu a sawi a. Vaihlo turah hian mihringte natna hrang hrang thlen theitu leh thihna hial pawh thlen theitu a awm avangin vaihlo zuk leh hmuam laka fihlim tur leh a ti mekte pawh sim tum turin a chah a ni.

He hunah hian Lunglei Municipal Council (LMC)-a Vice Chairman Pu K. Lalrinawma bakah, Health & Family Welfare Department (H&FW) hotute - Secretary Pi Sangchhin Chinzah, Principal Director Dr Vanlalsawma, DHME Director Dr Lalthlengliani leh NHM Mission Director Dr Eric Zomawia te, Lunglei Additional Deputy Commissioner Pu James Miahlung leh Lungleia health department-a thawktute leh Southern Flower School Lungleia zirlaite an tel a. Vaihlo leh a kaihhnawihin hriselna a khawih pawi theih dan te, vaihlo chu thihna thlentu a nih thu te leh zuk leh hmuam laka inthiar fihlim tura inzirtirna thu ziakte kengin Civil Hospital Lunglei kawt aṭanga Convention Centre kawt thlengin kawng an zawh a ni.