2231/2026-2027

Lunglei, 2026 Mimkut Thla ni 16: Vawiin khan Lunglei District Leitlangpui Run Core Committee chu a ṭumkhat nan an Chairman, District Bawrhsap Pi Navneet Mann kaihhruaiin Lunglei DC Conference Hall-ah an ṭhu khawm a. Ṭhut khawmah hian sawrkar office hrang hrang hotute, sipai lamte, tlawmngai pawl hrang hrang ai awhte, NHIDCL leh contractor-te leh Lunglei District Athletics Association ai awhte telin, Lunglei Deputy Commissioner Office huaihawta hriselna leh thawh hona ṭha siam tura intlansiakna, 1st Leitlangpui Run 2026 buatsaih tur chungchang an sawi ho.

Chairman Pi Navneet Mann chuan Lunglei chu India hmarchhaka khawpui hlun leh pawimawh ber pakhat a nih thu sawiin, Leitlangpui Run buatsaih tur chu a ṭha zawnga Lunglei khawpui tar langtu leh hmun dang aṭanga tlawhtu leh ngaihventu an pun lehzualna a nih beisei a nih thu a sawi a. Leitlangpui Run hlawhtling tak huaihawt turin department leh pawl hrang hrangte thawh hona ṭha a pawimawh thu sawiin, member-te chu ngunthluk taka ngaihtuahna seng tur leh theih tawp chhuahpui turin a ngen a. Lunglei District chhung bakah, District pawn lam leh ram pawn lam thlenga intlansiaka tel an awm a beisei thu sawiin, mipuite pawh phur taka tel turin a sawm nghal bawk.

He ṭhut khawmah hian 1st Leitlangpui Run 2026 buatsaih tur atana ṭul leh pawimawh hrang hrangte, department leh pawl hrang hrangte tih tur leh mawhphurhnate sawi ho niin, chak zawka hma lak a nih theih nan sub-committee hrang hrang din a ni a. Intlansiak buatsaih dan tur ruahmanna, Standard Operating Procedure (SOP) thlir ho a ni bawk.

1st Leitlangpui Run 2026 buatsaih hun atan hian November ni 6, 2026 (Zirtawpni) tinzawn niin, intlansiak hi huang (category) thum – 10KM, 5KM leh 3KM-a buatsaih tum a ni a. Intlansiak lama ei zawngte leh thiamna bik neite pawhin an pawmpui certificate leh ranking felfai leh ṭha tak awm thei tura kalpui tum a ni.