879/2026-2027

Lunglei, 2026 Nikir thla ni 7: Vawiin chawhnu khan Jubilee Hall, Presbyterian Church, Venglai, Lungleiah 40 Days Healthy Lunglei Intensive Campaign hun hman niin, hriselna chungchang leh LushAI Healthy Lunglei App chungchang inzirtir a nih bakah, a thlawnin kal khawmte hriselna dinhmun endiksak an ni.

Kristian Ṭhalai Pawl (KṬP), Venglai Branch aṭangin Nl. H. Zionpari chuan hun kaihruaiin, Lunglei Sub-Deputy Commissioner Pi Lalnunchhani Hnamte chuan 40 Days Healthy Lunglei Intensive Campaign chungchang a sawi zau va. Healthy Lunglei hma lakna ṭha taka ṭawiawm tur te, hriselna kaihhnawiha tih tur leh tih loh turte ṭha taka zawm tur leh LushAI Healthy Lunglei App chu hman ṭangkai tum ṭheuh turin kal khawmte a chah.

Urban Health & Wellness Centre (UHWC) Sethluna Medical Officer Dr Malsawmtluangi Khiangte chuan natna inkai chhawn theih loh (non-communicable disease) chungchang te, NCD laka inven dan leh nunphung hrisel neih pawimawhna te, hriselna atana tih tur leh tih loh tur hrang hrangte powerpoint presentation hmangin a zirtir a. Data Entry Operator Pu K. Hmingthanmawia'n LushAI Healthy Lunglei (LHL) App chungchang sawi fiahin, application hman dan a takin a zirtir bawk.

He hunah hian KṬP member mi 70 chuang an kal khawm a. Medical Team te'n health screening buatsaih chhunzawmin, mi 25 te hriselna dinhmun endik a ni a. Kal khawmte hian a hmunah LushAI Healthy Lunglei App chu an mobile phone-ah an dah lut (install) nghal bawk.

LushAI Healthy Lunglei app hmang hian district chhunga sawrkar damdawi in leh health centre-a daktawrte ṭhut hun tur a en theih bakah, OPD-a inentir turin appointment a lak lawk (book) theih a. ABHA-a inziah luhna te, he app-a inziak lut damdawi dawr (pharmacy)-te aṭanga damdawi chah theihna te awmin, hriselna lama hriat tur pawimawh hrang hrangte pawh awlsam takin a hmuh theih a. OPD appointment laknaa pui thei tur leh zawhna hrang hrang Mizo ṭawnga chhang thei tur AI chatbot dah tel a ni bawk a. Android hmangte tan play.google.com/store/apps/details?id=com.lushaihealthylunglei.android aṭangin leh iOS hmangte tan apps.apple.com/in/app/lhl/id6755673586 aṭangin download theih a  ni.