Vawiin chawhma khan Lunglei DC Conference Hall-ah Aadhar sensitization meeting cum workshop neih a ni a, Lunglei Addl. DC Pu JH Lalrimawia, MCS chuan kaihruaiin, Lunglei DC Pi Lalzarmawii, IAS in a hmanpui.

Pi Lalzarmawii chuan tunlaiah sawrkar atanga hamthatna dawng tur chuan India khua leh tui te tan Aadhar Card neih a tul tawh a, chu chu kan chanvo a ni, a ti a. Mipuiin a tangkaina kan hre chho zelin, corruption pawh nasa takin a do thei dawn a ni, a ti. Mizoram bikah chuan National Population Register (NPR) based Biometric Enrolment hmangin October ni 5, 2013 atang khan kalpui tan a ni a, October ni 31, 2016 hmaa zo hman vek tura ruahman a nih laiin, sawrkarin mipuite hmakhua ngai in March ni 31, 2017 thleng hun a pawh sei thu a sawi a. State Level UIDAI Implementation Committee hnuaiah Enrolment Model thar duan niin, Lunglei chu District zinga hma la hmasa ber pawl an nih thu a sawi a ni.

Pi Josephine Zonunsangi, SDC chuan model thar sawi zauna a nei a, National Population Register hmanga biomentric enrolment tih a nih toh loh tur thu a sawi. E-District Manager Pu C. Lalthlengliana pawhin model thar hnuaia Aadhar Enrolment Process chungchang a sawi a ni. Model thar hnuaiah hian Information & Communication Technology (ICT) department chu Nodal Department niin, General Administration Department (GAD) chu Registrar atan ruat a ni a, DC Office tin te Enrolment Agency atan ruat an ni bawk.

Tun dinhmunah Mizorama mi 42% ten biometric enrolment an ti tawh a, Lungleiah chuan April ni 4, 2016 thleng khan mi 70,233 (55.17%) ten an ti tawh a ni. Lunglei District-ah Enrolment Centre pariat (8) awm tura ruahman a ni a, mi 57,081 ten enrolment la hmabak in, Town Area chhungah chuan VC-wise a enrolment hi kalpui tum tih tarlan a ni.