Thlai leh thei chi (variety) tha zawk neih theih nan variety awm sa tawhte humhalh leh hemi kawnga tha thawhtu leh neitu farmer-te dikna leh chanvo humhalh nan a India Sorkarin Dan a lo siam tawh "Protection of Plant Varieties & Farmers' Right Act, 2001" chungchang inzirtirna vawiin khan KVK Champhai District chuan Ngopa-ah kuthnathawktute tan a buatsaih.

He Awareness Campaign-ah hian Pi Lalrinawmi Renthlei, Sr Scientist & Head chuan zirtirna pe in, Mizorama hmasang a kan thlai lo chin tawh te chu a neitu nihna kan hauh tlat theih nan registration tih a tul a tarlang a. Protection of Plant Varieties & Farmers' Right Act hnuaia kan thlai neih te hi a neitu nihna kan hauh hlawkna leh lukhawng a neih dan te leh, Award te hial pawh dawn theih a nih dan a sawifiah a ni.

He hunah hian Pi R Vanlalduati Soil Scientist chuan, Soil Test Based Fertilizer Recommendation-ah zirtirna pe bawk in, soil sample lak dan te leh thlai chaw chi hrang hrang hnathawh dan te, lei chaw tha (nutrient) tlakchham vanga thlai in a tawrh dan te, a enkawl zui dan leh thlai chaw pek dan dik te inzirtirna a pe a ni.

He Awareness Campaign-ah hian zawhna leh chhanna hun hman niin, KVK Champhai District chuan kuthnathawktute mamawh tur thlai tana tangkai damdawi chi hrang hrang an sem nghal bawk.