Mizoram sawrkarin vawk vulh thlangtu 3rd & 4th Phase NLUP beneficiary-te hnena tualchhunga thar chhuah ngei vawkte sem tura a tih chu Lawngtlaiah chuan vawiin khan DVO Training Hall-ah H&TE, etc. changtu Parliamentary Secretary Pu H.Zothangliana’n a hawng.

Pu H.Zothangliana chuan NLUP-ah AH & Vety Department-in an thawh hlawk hle a, hlawhtlinpui pawh tam tak an awm a ni tiin, Lawngtlai paw’n hma sawnin, a changtu Minister hma laknain Mampui Farm pawh tihchangtlun a, vawkpui 50 vulh theih nana tihlen a ni, a ti a. Mamawh tak tak an la awm avangin NLUP chu chhunzawm zel a ni dawn tih sawiin, NLUP-a hma la tha leh tang tak takte puih zuina tur NEDP pawh duan a ni, a ti. Pu H.Zothangliana chuan NLUP tanpuina an dawn chu a tur ve renga ngaia dawng liam satliah mai lovin, hlawhtlinpui ngei tura hma la zui turin beneficiary-te chu a chah nghal bawk.

He hun hi Lawngtlai District AH & Vety Officer Dr B.Zonghinga chuan a kaihruai a. Lawngtlai DVO hnuaia NLUP tanpuina vawkte sem chhoh zel dan tur tlangpui a sawi fiah.

Lawngtlai District-ah hian NLUP hnuaia vawk vulh (Piggery Trade) thlangtu mi 628 an awm a. Centre 4 – Lawngtlai, Chawngte, Bualpui NG leh Sangau–ah te then niin, Lawngtlai Centre bikah hian beneficiary 364 an awm. Vawiin a hawn niah hian a bul tan nan mi 20 hnenah vawkte 23 sem hmasak phawt a ni a. Vawkte hi a tahtawla sem chhoh zel tur a ni.

Pu H.Zothangliana hi LADC-a Executive Member Pu ST Laldailova leh Pu L.Lawmkima te bakah, Lai DCC-a hruaitu eng emaw zatin an tawiawm a ni.