PRRS hri a len avanga thla 6 chhung vawk note sem chawlhsan a nih hnuin vawiin khan Mizoram-a district tinah AH& Vety department chuan NLUP 3rd leh 4th Phase hnuaiah vawk note sem chhunzawmna an nei leh a, heng vawk note hi tualchhung vawk niin a tam zawkte hi NLUP hmasa zawk vawkte an ni. NLUP hnuaia vawk note semna hun hawnna Launching of Piglet Distribution, Aizawl-a neih chu AH&Vety Department Minister Pu C.Ngunlianchunga'n a hmanpui a, Aizawl-a vawk note sem tur engemaw zat a vailiam bawk a ni.

He hunah hian AH&Vety Minister Pu C. Ngunlianchunga chuan vawiin a sem tan vawk note te hi NLUP hlawhtlinna tilangtu ani a ti a, natna hri a leng lo anih chuan NLUP avang hian ran ah Mizoram a intodelh a rin thu a sawi a ni. Minister chuan NLUP hnuaia ran dawng, hri avanga vanduaite chu sawrkar anga ral tum an nih thu a sawi bawk a, vawk bakah sial/bawngah Mizoram a intodelh thuai theihna turin hmalak a ngaih thu a sawi tel AH&Vety Department-a thawk te chu rinawm tur leh tan la thar tura a fuih bakah NLUP tanpuina dawngtu kalkhawm te fuihna thu Minister Pu C.Ngunlianchunga hian a sawi a ni.

AH&Vety Director Dr Saingura Sailo kaihhruai hun hmanaah hian AH&Vety Department-a NLUP Nodal Officer Dr. Vanlalenga chuan technical report a pe a. NLUP 3rd and 4th Phase hnuaiah hian beneficiary 8163 an awm mek a, vawknote sem tura ruahman zat chu 48978 niin tunah hian benificiary pakhat zel tan vawk note 6 zel sem tura ruahman a ni. October ni 25, 2016-a Chief Minister Pu Lal Thanhawla hova AH&Vety Department leh NLUP Implementing Board thukhawm chuan ramchhunga vawk note tharchhuah lei rawtna chu a pawm a, ni 28, 2016 khan Monitoring Plan/ Operational Guidelines ruahman fel a ni a, vawiin khan tualchhung vawk te hi sem nghal an ni.