MZP Hqrs, Mamit huaihawtin Inter High School Quiz 2016 Mamit District chu ni 4 zirtawp zan khan I&PR Conference Hall Mamit-ah zawh fel a ni. Dr Ngurdingliana, Chairman MAMCO chuan khuallian nia hmanpuiin, Lawmman semna a nei nghal bawk.
Khuallian Dr. Ngurdingliana chuan thusawina neiin, MZP Mamit in zirlaite hmasawnna tur ngaihtuaha quiz an buatsaih chu lawmawm a tih thu leh zirlaiten nasa taka an zirlaiah hmasawnna atana an hman a rin thu a sawi a. Mamit District -a zirlai te chu taimakna leh tumruhna lo chuan hlawhtlinna kawng zawh tur a awm lova zirlaiah te taima taka zir turin a fuih a, zirlaite chu hna awlsam ringawt hmuh tum lo a, hmasawnna zawk leh hmalam hun thlir reng chunga chona sang zawk nei turin a chah bawk a ni, Mamit District chu zirna lamah nasa taka hmasawn a ngaih thu sawiin, mithiam chhuak tam turin Kohhran, khawtlang hruaitute leh tlawmngai pawlte nena tan ho pawimawh hle a ni a ti. zirna hi hmasawnna kailawn hmasa ber leh pawimawh ber a nih thu a sawi bawk a ni.
Pu Lalropuia President MZP Headquarters Mamit pawhin thusawiin,Mamit District chhunga zirlaiten hma an sawn theih nana Quiz buatsaih an nih thu a sawi a, Tin, quiz-a tel zirlaite chu an zirlaiah nasa taka tangzel turin leh final round lut zawng zawngte phei chu kum 2017 HSLC Result chhuah hunah top-10 a langpha vek turin a beisei thu leh chutiang tura inzir zel turin a fuih bawk a ni. MZP President chuan mi inpal leh zirna ngaisangtute avanga quiz an buatsaih thei chu lawmawm a tih thu leh zirlaiten an hlawkpui a beisei thu a sawi bawk a ni.
He quiz intihsiakna-ah hian Mamit District atangin school pariat (8) telin MZP Quiz ah hian Presbyterian English School Mamit chuan lawmman Pakhatna la in pawisa fai Rs 20,000/- leh Citation an dawnga, Mamit High School - II chuan lawmman pahnihna dawngin Rs. 15,000 leh citation dawngin, St. Francis of Assisi High School chuan lawmman pathumna dawngin Rs. 10,000/- citation an dawng bawk a ni.
Lawmman chawimawina thuziak leh pawisa fai te hi Khuallian Dr Ngurdingliana, Chairman MAMCO hian a hlan a ni.
