3088/2024-2025
2024 Sahmulphah thla ni 19: Vawiin khan Lunglei District Additional Deputy Commissioner Pi Rochuangkimi Khenglawt chuan Zorun Events buatsaih Zorun Handloom Fair chu Saikuti Hall Ground Floor-ah a hawng.
Khuallian Pi Rochuangkimi Khenglawt chuan Zorun Events te'n sawrkar tibuai lo va, mahni insenga event an buatsaih leh stall chhangtute pawh mahni insengso veka chhang an ni chu lawmawm a tih thu leh entawn tlak a tih thu a sawi a. Sumdawnna kawnga a ṭha zawnga inel zel tur te, kutchhuak ṭha leh mawi, nalh leh tlo, man tlawm zawka mipui nawlpui lei ngam leh lei theih siam chhuah leh zawrh kawnga hma sawn zel tur tea chahin, a dawr neitute leh a leitute'n hlawkna hlu tak an neih theih nana duhsakna nen Fair hi a hawng a ni.
He hun hi Zorun Events Founder Pi Laldingngheti Pautu chuan kaihruaiin, Christian Hospital Serkawn-a Chaplain Rev. Zabiaka Vanphawng chuan Pathian hnenah a hlan a ni.
Zorun Handloom Fair-ah hian Aizawl, Thenzawl, Mualṭhuam leh Lunglei aṭangin Mizorama puan bu nei ṭha thlan bik, wholesale leh retail-a pe theite inphovin, a tlawm thei ang berin an kut chhuakte an zuar a. Handloom bakah hian Lunglei khaw chhunga mahni kutkawiha ei zawng mi eng emaw zatin stall an nei bawk.
Zorun Handloom Fair hian tun kar Inrinni, November ni 23 thleng a awh dawn a. Zing lam dar 11 aṭanga zan lam dar 9 thleng mipui dawr theihin hawn ṭhin a ni ang.
Attachment
- Loading attachment...
