2989/2022-2023
Lunglei the 8th December, 2022 - Vawiin khan Additional DC, Lunglei Pu Donny Lalruatsanga kaihhruaina in Advocacy cum Sensitization Programme hman a ni a. Lunglei DC Pu Kulothungan A,IAS chuan kalkhawmte lo lawmin raltlante tana chhawmdawlna kalpui meka hmalak tawhna zawng zawng chu tha a tih thu a sawi. He hunah hian Lunglei District a raltlan awm te mamawh hrang hrang ruahman sak tura hma la mektu NGO- The Adventist Development and Relief Agency (ADRA) ten District chhung a raltlante tana an hmalakna hrang hrangte chu Protection & WASH Coordinator Pi Sobha Jose hnen atangin report ngaihthlak a ni.
ADRA hmalakna project "Comprehensive Assistance to Vulnerable Refugees in Southern Mizoram" (CAR Project) hi thla 6 chhung kalpui tur a ni a, 1st July 2022 atanga kalpui tawh niin 30th November 2022 thleng a hmalakna hrang hrang te thlir ho a ni a. Lunglei district a raltlante awmna camp hi hmun 10-ah awm in chung camp zinga 4-ah chuan High density polyethylene (HDPE) tui pipe leh tui connection dah a ni a, camp dangah pawh tui connection leh tui dah khawlna Sintex tanky(1000 ltr) te dah a ni tawh a, tui tih thianghlimna(LifeStraw Max leh LifeStraw community water purifier) te dah niin,vantlang inthiarna(community toilet)te siam tawh a ni.
He project hnuaiah hian Protection Programme kalpui niin Gender Balanced Camp Committee din a ni a- naupang,hmeichhia,pianphung a rualbanlo, tar chaklo leh LGBTQIA+ te harsatna sutkianna atana din a ni. He programme-ah hian camp tin atan Facilitator pakhat zel ruat a ni.
Raltlante mamawh hrang hrang – ei leh bar (food/dry food), mimal mamawh (hygiene kits – toothbrush, tooshpaste, soap etc), thosilen, blanket, bungbel, bedsheet, dignity kit (undergarments, sanitary pads), naupang tan education kit (zirlaibu, pen, pencil, schoolbags etc) te pek an ni a, an infiamna tur hmun (Child Friendly Spaces) 50 siam tawh a ni, sumfai tanpuina pawh sem chhuah mek zel a ni.
He hunah hian programme chhimtute nen zawhna leh chhanna hun hman a ni a, Pu Zodinliana, District Project Coordinator ADRA/CPD in lawmthu sawina neiin hun a khar a ni.
